Europa League: Arsenal yatangiye inyagirira Eintracht Franfurt imbere y’abafana bayo
Ikipe ya Arsenal iheruka kugera ku mukino wa nyuma wa Europa League, yatangiye irushanwa yitwara neza, itsindira Eintracht Franfurt ibitego 3-0 imbere y’abafana bayo mu mukino wa mbere wo mu itsinda F wabaye kuri uyu wa Kane mu Budage.
Frankfurt yagerageje gutangira umukino igaragaza ko ifite inyota yo gufungura amazamu mbere ya Arsenal, nyuma y’amashoto aremereye yatewe na Danny Da Costa rifatwa n’umunyezamu mbere y’uko André Silva atera irindi rikomeye ryanyuze imbere y’izamu.
Arsenal yarokowe n’umunyezamu Emiliano Martinez inshuro ebyiri ku mipira yatewe na Filip Kostić, araryama ayigaruza ikiganza mbere y’uko Granit Xhaka na Mustafi bakiza izamu .
Ku ruhande rwa Arsenal,Pierre-Emerick Aubameyang na Bukayo Saka bahushije uburyo bwashoboraga guhesha Arsenal kuyobora umukino hakiri kare mu gihe igitego kimwe cyabonetse mu gice cya mbere, cyatsinzwe na Joe Willock ku ishoti yateye ku munota wa 38, umupira ukora kuri myugariro wa Frankfurt ujya mu izamu.
Ku munota wa 79 w’umukino,Dominik Kohr wa Eintracht Franfurt yahawe ikarita ya kabiri y’umuhondo ahita ava mu kibuga isigara ari iy’abakinnyi 10.
Bukayo Saka w’imyaka 18, yatsindiye Arsenal igitego cya kabiri ku ishoti yatereye inyuma y’urubuga rw’amahina ku munota wa 85 mu gihe Aubameyang yatsinze icya gatatu nyuma y’iminota itatu ubwo yari asize ba myugariro ba Frankfurt, aroba umunyezamu Kevin Trapp.
Muri iri tsinda kandi, Standard de Liège yo mu Bubiligi, yakiriye Vitoria de Guimaraes yo muri Portugal, iyitsinda ibitego 2-0.
Mu yindi mikino yabaye kuri uyu wa Kane, Manchester United iheruka gutwara iri rushanwa mu 2017, yatsinze Astana igitego 1-0 cya Mason Greenwood mu itsinda L mu gihe Partizan Bergrade yanganyije 2-2 na AZ Alkmaar.
F91 Dudelange yo muri Luxembroug, igizwe n’abakinnyi baba bafite indi mirimo, yatsindiye APOEL Nicosia iwayo ibitego 4-3 mu mukino wo mu itsinda A mu gihe Qarabag FK yatsinzwe na Seville ibitego 3-0.
