EPL: Inzovu yatangiye kurira umunyenga ku gicuma cyiburungushuye
Ikipe ya Arsenal imaze igihe kinini iyoboye urutonde rwa Shampiyona y’Abongereza y’icyiciro cya mbere (Premier League), yatunguwe n’ikipe ya Brentford inanirwa kuyikuraho amanita 3 mu mukino wahuje aya makipe yombi kuri uyu wa Gatandatu tariki ya 11 Gashyantare 2023.
Ku isaha y’isaa munani n’igice ni bwo imikino ya shampiyona y’u Bwongereza yo ku munsi wa 23 yatangiye gukinwa, umukino wabimburiye indi ni uwa West Ham yakiriye Chelsea birangira banganyije 1-1.
Undi mukino wa kabiri ukomeye wabaye saa kumi n’imwe aho ikipe ya Arsenal yakiriye Brentford, umukino urangira amakipe yombi nayo anganyije igitego 1-1.
Iyi kipe ya Arsenal abantu benshi bakunze kuvuga ko n’ubwo iyoboye urutonde itazageza ku munsi wa nyuma ikiri ku mwanya w’imbere aho hari abagiye bayigereranya n’inzovu ihagaze ku gasongero k’igiti abandi bakayifata nk’inzovu irikurira umunyenga ku gicuma.
Amanota ari hagati ya Arsenal n’andi makipe ayikurikira akomeje kuvaho urutorongo,aho ubu bamwe baba batangiye kuvuga ko ibimenyetso byo guhigamira andi makipe byatangiye kugaragara.
Muri uyu mukino ikipe ya Arsenal yakiriye Brentford kuri Emirates stadium. Arsenal yatangiye irokoka ku munota wa 6 gusa ubwo Brayn Mbeumo wa Brentford yahinduraga umupira mwiza imbere y’izamu usanga Rico Henry ariko atera impande y’izamu gato.
Arsenal yakomeje gukina umupira wayo mwiza ishushanya ariko abakinnyi bayo bakina imbere bakabanirwa no gutera mu izamu.
Ba rutahizamu ba Brentford baranzwe no kugera imbere y’izamu rya Arsenal bakarekura imipira iremereye. Nko ku munota wa 17 Ivan Tony yarekuye ishoti ripima amatoni ariko riragenda rikubita igiti cy’izamu. Igice cya mbere cyarangiye amakipe yombi anganya 0-0.
Igice cya kabiri cyatangiye Arsenal yihambira ngo irebe ko yabona igitego. Ku munota wa 50 Bukayo Saka yahinduye umupira, usanga Martin Odegaard nawe arekura ishoti riremereye ariko David Raya ahita awufata.
Abakinnyi ba Brentford bakiniye inyuma, Arsenal nayo ihiga igitego irakibura. Ku munota wa 66 ni bwo Imana yatabaye Bukayo Saka ahindura umupira usanga Leandro Trossard winjiye mu kibuga asimbuye, ahita atsinda igitego cya 1 cya Arsenal.
Brentford yabonye igitego cyo kwishyura ku munota wa 74 gitsinzwe na Ivan Toney ahawe umupira na Christian Norgaard. Umukino warangiye amakipe yombi anganya igitego 1-1.
Kugeza ubu Arsenal ni yo iyoboye urutonde rwa shampiyona n’amanota 51 naho Brentford yo ni iya 8 n’amanota 34.
Mu yindi mikino yabaye, ikipe ya Tottenham yanyagiwe na Leiceter City ibitego 4-1, Crystal Palace inganya na Brighton 1-1, Fulham itsinda Nottingham Forest ibitego 2-0 naho Southampton itsindwa Wolverhampton Wanderers ibitego 2-1.
