DR Congo: Imvura y’amahindu yahitanye abagera kuri 24

Imvura idasanzwe yaguye mu ijoro ryo ku wa kane rishyira ku wa gatanu rishyira ku wa gatanu yateye umwuzure watumye abagera kuri 24 bahasiga ubuzima mu gace gahana imbibi n’Uburundi ka Uvira.

Ibi biri mu itangazo ryasohowe n’ibiro bya perezida wa Repubulika Iharanira Demukarasi ya Congo riri ku rubuga rwa tweeter rivuga ko iyi mvura yaguye ari nyinshi yanatumye abagera kuri 45 bakomereka.

Mu nama yagiranye n’abaminisitiri mu buryo bw’ikoranabuhanga, perezeda wa Congo, Bwana Felix Atoine Tshisekedi yavuze ko iyi imvura idasanzwe yaguye mu bice bya kivu y’amajyepfo, Maniema, Haut-Lomami na Tanganyika.

Mu nkuru yanditswe na BBC, Perezida Tshisekedi yasabye ko hakorwa ibishoboka byose bakagoboka abagizweho ingaruka n’ibi biza.

Mu ikiganiro yagiranye na radiyo okapi y’umuryango w’abibumbye muri Congo, umuyobozi wungirije muri Uvira, Kiki kapenda Kifara yatangaje ko ibikorwa byo gushakisha abandi baba bahitanywe n’iki kiza baba bagwiriwe n’inkuta.

Imvura yaguye muri iki gihugu yatumye imigezi n’inzuzi muri utu duce byuzura aho kugeza ku mugoroba w’uyu wa gatanu bwana Kapenda yanavuze ko uruzi rwa Mulongwe rwari rukirengewe n’amazi rutaruzuruka.

Iki kiza kibaye mu gihe n’ubundi Repubulika Iharanira Demokarasi ya Congo isanzwe mu rugamba rwo guhangana n’ibindi byorezo bibiri harimo icya Covid-19 ndetse na Ebola iherutse kongera kwaduka muri iki gihugu nyuma y’iminsi mike ishami ry’umuryango w’abibumbye ryita ku buzima (OMS) ritangaje ko nta Ebola ikiharangwa.

Mu mibare itangazwa na Kaminuza y’ubushakashatsi ya Johns Hopkins ivuga ko kuva ku ya 10 werurwe ubu muri Congo habarurwa abagera kuri 287 banduye covid-19 muri bo 23 bakaba barahitanywe na yo.

Comments

comments