AmakuruImyidagaduro

Bruce Melodie niwe uzahagararira u Rwanda mu gitaramo cyateguwe na Konde Music Worlwide

Umuhanzi Bruce Melodie uri mu bakunzwe mu muziki nyarwanda kubera uburyohe bw’indirimbo ze zitandukanye, niwe muhanzi uzahagararira u Rwanda nuri Tanzania.

Uyu muhanzi uri kubarizwa mu mujyi wa Dubai agiye gutaramira mu muri Tanzania mu gitaramo kiswe Afro East Carnival cyateguwe na Konde Music Worlwide y’umuhanzi Harmonize.

Itahiwacu Bruce wamamaye mu muziki nka Bruce Melodie akomeje urugendo rwo kuzenguruka ibihugu bya Afurika y’iburasirazuba mu bitaramo bitandukanye.

Urwo rugendo rwahereye ku bushuti bwihariye Bruce Melodie yagiranye na Harmonize muri Tanzania bukomereza kuri Koffi Olomide muri RDC.

Bruce Melodie aherutse kubwira The Choice Live ko Harmonize na Koffi Olomide aribo bamusabye ko bakorana indirimbo arenzaho ko zombi zarangiye gukorwa zitegereje gusohorwa.

Nyuma yo kuvuga ibi Bruce Melodie yahise yerekeza Tanzania kurangiza indirimbo ye na Harmonize ndetse anahura na bamwe mu bashoramari b’uyu muhanzi.

Bruce Melodie uretse gukora ku ndirimbo na Harmonize , yanakoreyeyo indirimbo nyinshi zirimo iyitwa “Izina” aherutse gushyira hanze.

Tariki 27 Mutarama 2022 nibwo Harmonize yashyize hanze itangazo rimenyesha abamukurikira ku mbuga nkoranyambaga ko ari gutegua igitaramo mbaturamugabo kizahuza abahanzi bakomeye muri Afurika y’iburasirazuba.

Icyo gihe Harmonize yatangaje ko iki gitaramo giteganyijwe tariki 05 Werurwe 2022 kikabera ahazwi nka Tabata mu mujyi wa Dar El Salaam.

Uyu munsi tariki 08 Gashyantare nibwo Harmonize yashyize hanze urutonde rurerure rw’abahanzi bazaririmba muri iki gitaramo biganjemo abo muri Afurika y’Iburasirazuba.

Bruce Melodie niwe muhanzi nyarwanda rukumbi wagaragaye kuri uru rutonde rurerure ruriho abahanzi bakomeye muri aka karere nka Harmonize ,Otile Brown, Eddy Kenzo, Fik Fameika, Darassa , Skales, Owilo Longomba, Roberto , Juma Jux n’abandi.

Si ubwa mbere Harmonize na Bruce Melodie bagiye guhurira ku rubyiniro, cyane ko ubwo Bruce Melodie yari muri Tanzania uyu muhanzi yamwifashishije mu gitaramo cyo kumurika Alubumu ye “High School” cyabereye mu mujyi wa Arusha.

Bruce Melodie kugeza ubu ari kubarizwa mu mujyi wa Dubai ahari kubera Expo Dubai 2020 yitabiriwe n’ibihugu birimo u Rwanda.Biteganyijwe ko azagaruka mbere ya tariki 12 Gashyantare 2022 bitewe n’imyiteguro y’igitaramo agiye gukorera mu gihugu cya Repubulika Iharanira demokarasi ya Congo.

Twitter
WhatsApp
FbMessenger