APR FC yagaruye Dr Ljubomir “Ljupko” Petrović wahoze ari umutoza wayo
Umunya Serbia Dr Ljubomir “Ljupko” Petrovic wahoze ari umutoza mukuru wa APR FC yagarutse muri iyi kipe y’ingabo z’igihugu, nyuma y’imyaka isaga2 atandukanye nayo mu buryo butigeze bumenyekana neza.
Nk’uko byabyutse bitangazwa mu gitondo cyo kuri uyu wa kane, uyu musaza w’imyaka 70 y’amavuko yageze I Kanombe mu gicuku cyo kuri gishyira uyu wa kane aho yakiriwe na Kalisa Adolphe Camarade usanzwe ari umunyamabanga mukuru w’iyi kipe yambara umukara n’umweru.
Amakuru ahari avuga kandi ko uyu mutoza yazanye na mugenzi we ugomba kumwungiriza witwa Radanavic Miodrag, aba bombi bakazaba bafatanya n’abandi batoza bari basanzwe muri APR FC.
Ikipe ya APR FC ntihagaze neza muri shampiyona y’ikiciro cya mbere dore ko ihagaze ku mwanya wa gatatu n’amanota 21, ni nyuma yo kugwa miswi 0-0 na Miroplast ku munsi w’ejo mu mukino w’umunsi wa 12 wa shampiyona.
Dr Ljubomir Petrovic ni umugabo w’imyaka 70 unafite ibigwi bikomeye cyane mu mupira w’amaguru kuko uretse afite ubunararibonye bw’imyaka 35 mu butoza. Ikirenze ibi kandi yakoze amateka yananiye benshi mu batoza bakomeye ku mugabane w’uburayi yo kuba yarashoboye gutwara EUFA Champions League, aha akaba yari kumwe na Red Star Belgrade yo muri Serbia mu wa 1991, nyuma yo gutsinda Olympique de Marseille ku mukino wa nyuma .
Yanaciye kandi no mu yandi makipe akomeye nka Espanyol yo muri Espagne mu wa 1984 anayigarukamo mu wa 1991, Shangai Shenua hagati ya 1999 na 2000, Al Ahli Dubai , Olympiacos n’izindi.
