Abubaka mu cyahoze ari KIE baratabaza, abasaga 60 bakoze igisa n’imyigaragambyo

Bamwe mu baturage bubaka muri Kaminuza y’u Rwanda, hahoze hitwa KIE, ejo hashize bazindukiye mu gisa n’imyigaragambyo ku biro by’ishuri basaba guhembwa amafaranga bakoreye.

Mu baturage bagera kuri 60 bubaka inyubako zo muri iri shuri, barimo abafundi, abayedi, abasiga irangi n’abashushanya.

Mu gitondo cyo kuri uyu wa Gatanu, tariki ya 7 Ukwakira 2022, abo baturage bazindukiye kuri iryo shuri basaba guhabwa amafaranga y’ukwezi ndetse ko bahagaritswe mu kazi batazi impamvu.

Umwe muri aba yavuze ko ahora asiragizwa Kandi ntabwirwe igihe azishyurirwa.

Yagize ati “Ku bwange mfiteyo Frw 80,000 kandi iki cyumweru ni icya gatatu. Aho nahagarariye gukora bari batubwiye ngo barahita bayaduha, dutanga fotokopi (photocopy) y’irangamuntu, konti, batubwira ko amafaranga duhita tuyabona, none kugeza n’ubu sindayabona.”

Uyu avuga ko kuba atarahembwa kandi hari umuryango agomba kwitaho biri guhungabanya urugo rwe.

Yagize ati “Urabona turi mu bihe by’abanyeshuri kandi tuba dukeneye kugura impuzankano, ibikoresho ndetse no gutunga imiryango yacu kandi hariya twakoraga ntabwo baduhaga ayo kurya, twitegeraga, ibyo byose biba ari ukwirwanaho.”

Undi na we uhuje ikibazo n’uyu muturage, avuga ko ubuyobozi buhora bubizeza ko bagiye kwishyurwa ariko ntibishyirwe mu bikorwa.

Yagize ati “Nakoreye hano muri KIE ariko baratubabaje, baratubeshya, ntituzi ibibazo byahabaye, ntibashaka kubitubwira, turaza bakatubwira ngo turabona ubutumwa, turabona ubutumwa… Icyumweru cyirashira, ukwezi kurashira.”

Yakomeje agira ati “None abana ntibiga, badusohoye mu nzu, none baranaduhagaritse ntitunakora noneho. Ibaze guturuka Kimisagara n’amagaru tuje kwishyuza, abandi Nyabugogo, Nyamirambo. Turababaye cyane.”

Ushinzwe kubakisha izo nyubako ndetse no gucunga umutungo, Maniragaba Francois, yavuze ko atagira icyo atangaza kuko atari we ushinzwe gutanga amakuru.

UMUSEKE dukesha iyi nkuru uvuga ko wagerageje kuvugisha umuyobozi Nshingwabikorwa muri Kaminuza y’u Rwanda, Nzitatira Wilson, ariko na we ntiyashima kutuvugisha.

Aba baturage barasaba ko bahabwa amafaranga bakoreye cyane ko bahagaritswe mu kazi.

Comments

comments