Zinedine zidane agiye gusanga Christiano Ronaldo muri Juventus
Zinedine Zidane wagacishijeho muri Real Madrid nk’umukinnyi ndetse n’umutoza, agiye kwerekeza mu kipe ya Juventus de Turin imaze iminsi isinyishije Christiano Ronaldo yatozaga mu kipe ya Real Madrid.
Ku munsi w’ejo ku wa mbere ni bwo Christiano Ronaldo yakoze ikizamini cy’ubuzima, anerekanwa ku mugaragaro nk’umukinnyi mushya w’ikipe ya Juventus.
Ibinyamakuru bitandukanye byo ku mugabane w’Uburayi byatangaje ko Zidane wamamaye ku kazina ka Zizou agiye kujya muri Juventus nka directeur wa siporo aho azajya afatanya aka kazi na Fabio Paratici. Byitezwe y’uko byinshi birambuye kuri iyi nkuru Zidane abisobanura muri iri joro.
Mu mpera z’ukwezi kwa gatanu ni bwo Zinedine Zidane yasezeye ku nshingano zo kuba umutoza wa Real Madrid, nyuma yo kuyihesha UEFA Champions league ya 14 mu mateka yanabaye iya gatatu yikurikiranya yari atwaranye na yo kuva yayigeramo mu 2016 asimbuye Rafa Benitez.
Zinedine Zidane yisanga muri Juventus kuko ari yo yamugize igihangage mbere yo kuyisohokamo muri 2001 akerekeza muri Real Madrid, imutanzeho akayabo ka miliyoni 75 n’igice z’ama Euro.
Juventus yari yaratwaranye na yo ibikombe 2 bya shampiyona y’Abatariyani, gusa ntiyigeze atwarana na yo UEFA Champions league.
Byitezwe y’uko Zidane agomba gutangira akazi muri Juventus mu kwezi k’Ukwakira.
