Zamalek SC ni yo yegukanye igikombe cya CAF Confederations Cup 2019 (Amafoto)
Ikipe ya Zamalek yo mu gihugu cya Misiri, yaraye yegukanye igikombe cy’irushanwa Nyafurika rihuza amakipe yatwaye ibikombe iwayo (Total CAF Confederations Cup) nyuma yo gutsinda Renaissance Sportive de Berkane yo muri Maroc ku mukino wa nyuma.
Zamalek yegukanye iki gikombe nyuma yo gutsinda RS Berkane kuri Penaliti 5-3. Ni nyuma nyuma y’uko imikino ya nyuma yombi amakipe yombi yari yahuriyemo buri kipe yari yashoboye gutsinda indi igitego kimwe ku busa.
RS Berkane yari yatsinze Zamalek igitego 1-0 mu mukino ubanza wari wabereye muri Maroc mu cyumweru gitaha, Zamalek iza kukishyura mu mukino waraye ubereye mu Misiri.
Imbere y’abafana 60,000; Zamalek yafunguye amazamu ku munota wa 53 ibifashijwemo na Mahmoud Alaa. Ni igitego uyu musore yatsinze kuri Penaliti nyuma y’uko umusifuzi yari amaze kwiyambaza VAR agasanga myugariro wa RS Berkane yari yakinnye umupira n’akaboko.
Muri rusange ikipe ya Zamalek ni yo yihariye igice kinini cy’uyu mukino, gusa ntiyabasha kubyaza ibitego uburyo bwinshi yabonye imbere y’izamu ry’Abanya-Mar0c.
Nyuma y’uko iminota isanzwe y’umukino yari imaze kurangira amakipe yombi anganya igiteranyo cy’igitego kimwe ku kindi, byabaye ngombwa ko hiyambazwa za Penaliti.
Ikipe ya Zamalek yinjije Penaliti eshanu zayo ibifashijwemo na Khaled Boutaib, Muhmoud Alaa, Abdallah Gomaa, Yousef Obama na Ahmed “Zizo” Sayed. RS Berkane yo yahushije Penaliti imwe yatawe hanze na Laachir.
Gutwara iki gikombe byahise bikuraho imyaka 16 Zamalek yari imaze itazi uko gutwara igikombe cyo ku mugabane wa Afurika bimera. Iyi kipe yaherukaga gutwara igikombe cyo ku mugabane wa Afurika muri 2003 ubwo yatwaraga Super Coupe yo ku mugabane wa Afurika.
Iki gikombe kandi cyahise kigira Zamalek ikipe ya kabiri imaze gutwara ibikombe byinshi byo ku mugabane wa Afurika, inyuma ya Al Ahly yo mu Misiri ifite ibikombe 20. Zamalek yo ifite ibikombe 12, mu gihe TP Mazembe ifite ibikombe 11.
