Young Africans na KCCA zamaze gutangaza ko zitazitabira CECAFA y’uyu mwaka
Ikipe ya Yanga Africans yo muri Tanzania na Kampala City Council yo muri Uganda zamaze kwandikira ubuyobozi bwa CECAFA ko zibumenyesha ko zitazitabira irushanwa rya CECAFA Kagame Cup riteganyijwe kubera i Dar Es Salaam muri Tanzania guhera mu mpera z’uku kwezi kugeza muri Nyakanga.
Ikipe ya Young Africans iherereye mu tsinda rya gatatu, isangiye na mukeba wayo w’ibihe byose Simba Sports Club, St George yo muri Ethiopia na Deekadah yo muri Somalia.
Ikipe ya KCCA yo yari yashyizwe mu tsinda rya mbere, isangiye na AZAM yo muri Tanzania, JKU FC yo mu birwa bya Zanzibar na Kator FC yo muri Sudan y’amajyepfo.
Impamvu nyamukuru aya makipe yanditse asaba kuva mu irushanwa ni mu rwego rwo kubona umwanya uhagije wo kwitegura imikino Nyafurika aherereyemo.
Ikipe ya Young Africans iri mu matsinda ya CAF Confederations Cup aho iza ku mwanya wa nyuma mu itsinda rya kane isangiye na USM Alger yo muri Algeria, Rayon Sports yo mu Rwanda na Gor Mahia yo muri Kenya.
KCCA yo iri mu itsinda rya mbere rya CAF Champions league isangiye na Esperance de Tunis yo muri Tunisia, Township Rollers yo muri Namibia na National Al Ahlly yo mu Misiri. Iyi kipe kandi iza ku mwanya wa gatatu muri rino tsinda n’amanota atatu.
Biteganyijwe y’uko ikipe ya KCCA izasimburwa n’ikipe ya Vipers yo muri Uganda yatangaje ko yiteguye kwitabira aya marushanwa n’ubwo nta ibibamenyeshwa barashyikirizwa n’ubuyobozi bwa CECAFA.
Ubuyobozi bw’ishyirahamwe ry’umupira w’amaguru muri Tanzania bukimara kubona ubusabe bw’ikipe ya Yanga bwatangaje ko iki ari icyemezo kigayitse ku kipe nka Yanga, buyisaba kwisubiraho ku cyemezo yafashe.
” Ntabwo bikwiye ko ikipe ya Yanga Africans yikura muri CECAFA Kagame Cup kubera imikino nyafurika kuko yaba ikipe ya Gormahia yo muri Kenya na Rayon Sports zo mu Rwanda zemeye kwitabira kandi zifite iyi mikino.”
” Twandikiye ikipe ya Yanga Africans tuyisaba kwisubiraho ku cyemezo kigayitse yafashe, kandi nizeye ko iraza kubikora ikemera kwitabira aya marushanwa.Wallace Karia, uyobora ishyirahamwe ry’umupira w’amaguru muri Tanzania aganira n’itangazamakuru ryo muri iki gihugu.
Imikino ya CECAFA iteganyijwe kubera i Dar ES Salaam guhera ku wa 28 Kamena kugeza ku wa 13 Nyakanga 2018.
