AmakuruAmakuru ashushyeImikino

World Cup: Argentina inaniwe kwikura imbere ya Iceland, Messi asubiramo ibyo muri Copa America

Ikipe y’igihugu ya Argentina inaniwe gutsinda umukino wa mbere w’igikombe cy’isi, nyuma yo kugwa miswi na Iceland 1-1 mu mukino Kapiteni wayo Lionel Messi yahushijemo Penaliti yagahaye iyi kipe insinzi.

Ikipe y’igihugu ya Argentina yakinaga umukino wayo usanzwe wo guhererekanya, mu gihe abakinnyi ba Iceland bacungiraga hamwe izamu ryabo bakanatakira icyarimwe.

Ku munota wa 07 w’umukino ni ho Argentina yabonye uburyo bw’igitego, ku mupira Nicolas  Tagliafico yateye n’umutwe ugaca hanze y’izamu rya Hannes Halldórsson.

Nyuma y’umunota umwe AlfreðLast Finnbogason yahise ahusha igitego ku ruhande rwa Iceland, Birkir Bjarnason yongera guhusha ikindi ku munota wa 10, ku mupira yateye ugaca hanze gato y’izamu rya Willy Cabarelo.

Argentina yafunguye amazamu ku munota wa 19 ibifashijwemo na Sergio Kunu Aguero, nyuma yo gucengera mu rubuga rw’amahina ba myugariro ba Iceland agahita aboneza umupira mu rucundura.

Ku munota wa 23 Birkir Bjarnason yahise yishyura iki gitego, ku mupira waterewe mu kavuyo ugakurwamo na Cabarelo bikarangira uyu musore awusubije mu rucundura.

Amakipe yombi yagumye kwatakana, gusa igice cya mbere kirangira ari 1-1.

Igice cya kabiri cy’umukino cyaranzwe ahanini no kwataka cyane ku ruhande rwa Argentina, Iceland na yo igafungira icyarimwe igacungira kuri Contre-Ataques.

Argentina yabonye amahirwe yo gutsinda igitego cya kabiri ku munota wa 64 w’umukino nyuma y’ikosa Sergio Aguero yari akorewe mu rubuga rw’amahina, gusa Penaliti ya Messi ikurwamo n’umuzamu  Hannes Halldorsson.

Ikipe ya Argentina yakomeje gukora ibishoboka byose ngo ibone igitego cya kabiri, gusa ba myugariro ba Iceland bagumya kuba ibamba.

Hategerejwe undi mukino w’iri tsinda uza guhuza Nigeria na Croatia saa tatu z’ijoro.

Argentina yakoze ibishoboka byose gusa Iceland igumya kuba ibamba.

Umuzamu wa Iceland apangura penaliti ya Messi.

Aguero atsinda igitego cya mbere.
Iceland yishimira igitego cyo kwishyura.
Abafana ba Iceland bahacanye umucyo.

Twitter
WhatsApp
FbMessenger