Van Dijk yahigitse Messi na Cristiano Ronaldo atwara igihembo cy’umukinnyi mwiza wa UEFA
Umuholandi Virgil van Dijk ukinira Liverpool yo mu Bwongereza, yegukanye igihembo cy’umukinnyi wahize abandi ku mugabane w’Uburayi mu mwaka w’imikino wa 2018/2019, ahigitse Lionel Messi na Cristiano Ronaldo bari bahanganye.
Virgil yegukanye iki gihembo ku ncuro ye ya mbere, nyuma yo gufasha Liverpool kwegukana UEFA Champions league batsinze Tottenham ibitego 2-0.
Uyu musore kandi yafashije ikipe ye kwegukana umwanya wa kabiri muri shampiyona y’Abongereza, ndetse anafasha ikipe y’igihugu cye cy’Ubuholandi kugera ku mukino wa nyuma wa UEFA Nations league.
Virgil van Dijk kandi yanatowe nka myugariro wahize abandi ahigitse Matthjis de Ligt na Trent Alexander-Arnlond.
Ku rundi ruhande, Lionel Messi bari bahataniye iki gihembo yatowe nka rutahizamu wahize abandi ku mugabane w’Uburayi, nyuma yo gutsinda ibitego 12 mu mikino 10 ya UEFA Champions league. Messi kandi yatsindiye FC Barcelona ibitego 36 muri shampiyona ya Espagne bimugira uwa mbere watsinze ibitego byinshi muri za shampiyona z’Iburayi.
Hanahembwe kandi umuzamu w’umwaka wabaye Umunya-Brazil Alisson Becker ukinira Liverpool, na ho umukinnyi mwiza wo hagati mu kibuga aba Frenkie de Jong kuri ubu ukinira FC Barcelona. Uyu musore yahigitse Christian Eriksen na Jordan Henderson bari bahanganye.
Umukinnyi wahize abandi mu bari n’abategarugori we yabaye Lucy Bronze wafashije Olympique Lyonnais kwegukana igikombe cya UEFA Champions league.
