AmakuruImikino

Umugande wamamaye mu kipe y’igihugu ya Uganda ari kugeragezwa na Rayon Sports

Brian Majwega, Umunya-Uganda wakiniye ikipe y’igihugu ya Uganda Cranes ari gukora igeragezwa mu kipe ya Rayon Sports ngo abe yayerekezamo.

Majwega w’imyaka 26 y’amavuko, asanzwe akina hagati mu kibuga, gusa ashobora no gukinishwa nka rutahizamu w’ibumoso(Ahazwi nko kuri 11.)

Uyu musore yageze mu Nzove ku gicamunsi cy’ejo ku wa gatatu, akorana imyitozo n’abakinnyi basanzwe b’ikipe ya Rayon Sports.

Uyu mukinnyi yabwiye abanyamakuru ko abashinzwe gushakira Rayon Sports abakinnyi ari bo bamusabye kuza mu myitozo y’iyi kipe, yashimwa n’umutoza agahita asinyishwa amasezerano. Brian Majwega yitezweho kugaragara mu mukino wa gicuti Rayon Sports izakinamo na Gasogi United ku wa gatandatu w’iki cyumweru.

Brian Majwega ni umwe mu bakinnyi bafite izina riremereye muri CECAFA, dore ko yakinnye mu makipe atandukanye yo muri kano karere yiganjemo ay’iwabo muri Uganda ndetse n’ayo muri Tanzania.

Uyu musore wari usanzwe akinira Maroons Football Club y’iwabo, yamenyekanye mu makipe nka KCCA yo muri Uganda, Azam FC yo muri Tanzania cyo kimwe na Simba Sports Club yo muri Tanzania.

Yanagaragaye kandi mu kipe y’igihugu ya Uganda Cranes yari mu mikino ya CHAN yo muri 2014. Amakuru avuga ko Majwega yakiniye Uganda Cranes imikino 32, akaba yarayitsindiye ibitego 6.

Brian Majwega mu mwambaro w’ikipe y’igihugu ya Uganda.
Twitter
WhatsApp
FbMessenger