Uko byari bimeze Simba SC ya Haruna na Kagere berekana igikombe batwaye-AMAFOTO

Kuri uyu wa Gatatu tariki 29 Gicurasi, Simba SC yo muri Tanzaniya yerekanye igikombe cya shampiyona iherutse kwegukana, abafana bari uruvunganzoka mu muhanda.

Ikipe ya Simba SC ikinamo abanyarwanda Meddie Kagere na Haruna Niyonzima, yisubije igikombe cya shampiyona ya Tanzania nyuma yo kujya gutsindira Singida United ku kibuga cyayo, mu mukino w’umunsi wa 36 wa shampiyona.

Ni igikombe cya 20 cya shampiyona ya Tanzania iyi kipe yegukanaga kikaba kije gisanga icyo begukanye mu mwaka w’imikino wa 2017/2018.

Haruna Niyonzima ukomoka i Rubavu yanditse amateka yo kuba umukinnyi wa mbere ushoboye gutwara ibikombe bitanu bya shampiyona ya Tanzania. Bitatu muri byo yabitwaye akinira Young Africans, ibindi bibiri abitwarana na Simba SC.

Shampiyona y’icyiciro cya mbere muri Tanzania imaze kugeramo abakinnyi bane babanyarwanda nyuma y’uko Issa Bigirimana na Sibomana Patrick basinyiye ikipe ya Young Africans Haruna yahoze akinira mbere y’uko yerekeza muri Simba SC.