AmakuruImikino

Uko amakipe agabanyije mu dukangara muri tombora ya UEFA Champions league iba uyu munsi

Kuri uyu wa kane i Monaco mu Bufaransa ni ho habera tombora y’uko amakipe yo ku mugabane w’Uburayi aza kuba agabanyije mu matsinda ya UEFA Champions league y’uyu mwaka.

Aya makipe uko ari 32, agabanyijwe mu dukangara tune, aho buri gakangara kaza kuvamo ikipe imwe yihuza n’aza kuva mu tundi, yose hamwe agakora amatsinda umunani.

Amakipe ashyirwa mu dukangara bitewe n’uko yitwaye mu marushanwa yo ku mugabane w’Uburayi y’umwaka ushize, uko yitwaye muri za shampiyona akomokaho ndetse n’uko izo shampiyona ziba zikomeye ku ruhando rw’Uburayi.

Urugero nk’agakangara ka mbere, gashyirwamo ikipe yatwaye UEFA Champions league, iyatwaye Europa league ndetse n’amakipe yatwaye ibikombe bya shampiyona muri za shampiyona esheshatu zikomeye kurusha izindi.

Aka gakangara karimo Liverpool yatwaye UEFA Champions league, Chelsea yatwaye UEFA Europa league, FC Barcelona yatwaye igikombe cya shampiyona ya Espagne, Manchester City yatwaye Premier league, Bayern Munich yatwaye Bundersliga, Juventus yatwaye Serie A, PSG yatwaye igikombe cya Ligue 1 na Zenit St Petersburg yatwaye igikombe cya shampiyona y’Abarusiya.

Agakangara ka kabiri kajyamo amakipe yarangije ku mwanya wa kabiri muri za shampiyona enye zikomeye kurusha izindi i Burayi, ndetse n’amakipe yatwaye ibikombe bya shampiyona mu bihugu bya Ukraine, Ubuholandi na Portugal. Kajyamo gashobora kujyamo kandi ikipe yabaye iya kabiri muri UEFA Champions league. Aka gakangara karimo Real Madrid, Atletico Madrid, Dortumund, Napoli, Shaktar Doneski, Tottenham, Ajax, na Benfica.

Impamvu Real Madrid iri muri aka gakangara kandi yarabaye iya gatatu muri shampiyona ya Espagne, ni uko Liverpool yabaye iya kabiri muri shampiyona y’Abongereza iri mu gakangara ka mbere.

Agakangara ka gatatu kajyamo amakipe yabaye aya gatatu muri za shampiyona enye zikomeye, ikipe yabaye iya kabiri muri shampiyona y’Abafaransa ndetse n’amakipe yatwaye ibikombe bya shampiyona mu bihugu bya Autriche, Ubugiliki, Ububiligi ndetse na Croatia.

Aka gakangara karimo Olympique Lyonnais, Bayer Leverkusen, Salzburg, Olympiacos, Club Brugge, Valencia, Inter de Milan na Dinamo Zagreb.

Agakangara ka nyuma kajyamo amakipe yabaye aya kane muri za shampiyona enye zikomeye Iburayi, iyabaye iya gatatu muri shampiyona y’Abafaransa, iyabaye iya kabiri muri shampiyona y’Abarusiya, iyabaye iya kabiri muri shampiyona y’Ababiligi ndetse n’amakipe yatwaye ibikombe mu bihugu bya Turkiya, Repubulika ya Tcheque, na Serbia.

Aka gakangara karimo Lokomotivo Moscouva, Genk, Galatasaray, Leipzig, Zlavia Prague, Crevena Zvezada (Red Star Bergrade), Atalanta na Lille.

https://twitter.com/ChampionsLeague/status/1166830883388702721

 

Twitter
WhatsApp
FbMessenger