UEFA yasohoye 3 bazatorwamo uw’umwaka batarimo Lionel Messi

Kuri uyu wa mbere, impuzamashyirahamwe ry’umupira w’amaguru i Burayi, UEFA, yashyize hanze abakinnyi batatu bazatorwamo umukinnyi mwiza w’umwaka wa 2018 i Burayi, barangajwe imbere na Cristiano Ronaldo, Modric na Mohamed Salah.

Aba bakinnyi batatu batarimo Lionel Messi, ni bo bagomba gutorwamo umukinnyi wahize abandi bose bakina ku mugabane w’ i Burayi mu mwaka w’imikino wa 2017/2018.

Uzaba yahize abandi azahembwa tariki ya 30 Kanama 2018 mu mujyi wa Monaco ubwo hazaba hari kuba tombola y’uko amakipe azahura muri Champions League.

Luka Modrić ukinira Real Madrid yatwaye igikombe cya Champions League, UEFA Super Cup, Spanish Super Cup, igikombe cy’isi cy’amakipe (FIFA Club World Cup), mu gikombe cy’isi cya 2018 afasha ikipe ye kugera ku mwanya wa kabiri batsindwe n’ubufaransa.

Cristiano Ronaldo ukinira Juventus yafashije Real Madrid  gutwara igikombe cya Champions League kuko yatsinze ibitego 15 agatanga n’imipira 3 yavuyemo ibitego, anatwara UEFA Super Cup, Spanish Super Cup, FIFA Club World Cup.

Mohamed Salah yafashije Liverpool kugera ku mukino wa nyuma wa Champions League batsindwa na Real Madrid ku mukino wa nyuma. Aha yayitsindiye ibitego 10 anatanga imipira 5 yavuyemo ibitego.

Abasigaye ni

Antoine Griezmann (Atlético & France) – 72 points
Lionel Messi (Barcelona & Argentina) – 55 points
Kylian Mbappé (Paris & France) – 43 points
Kevin De Bruyne (Manchester City & Belgium) – 28 points
Raphaël Varane (Real Madrid & France) – 23 points
Eden Hazard (Chelsea & Belgium) – 15 points
Sergio Ramos (Real Madrid & Spain) – 12 points