Tuyisenge na bagenzi be batsinze derby y’i Luanda yabahuje na Primeiro d’agosto

Rutahizamu Jacques Tuyisenge ukinira ikipe y’igihugu Amavubi na bagenzi be bakinana muri Petro Atletico de Luanda, bitwaye neza batsinda derby ya Luanda yabahuzaga na Primeiro d’agosto bahora bahanganye muri ruhago ya Angola.

Ihangana ry’amakipe yombi ntiriherera mu mupira w’amaguru gusa kuko no muri Basketball aya makipe aza imbere mu yayoboye ayandi hano ku mugabane wa Afurika.

Amakipe yombi yari yahuriye mu mukino w’umunsi wa 11 wa shampiyona ya Angola GirabolaZap2019/20, ukaba warangiye Petro Atletico itsinze ibitego 2-0. Ni umukino amakipe yombi yari yahuriyemo mu gihe Primeiro d’agosto iyoboye iyi shampiyona nta mukino n’umwe yari yagatsinzwe, mu gihe Petro Atletico yari iya kane yo yari yaratsinzwe umwe.

Tuyisenge umaze gutsindira ikipe ye ibitego bibiri yari muri 11 babanje mu kibuga, cyakora cyo nta gitego uyu rutahizamu w’Amavubi yatsinze muri uyu mukino.

Abafana ku mpande zombi bari babukereye, aba Petro Atletico bambaye imyenda yiganjemo amabara y’umuhondo n’ubururu, mu gihe aba Primeiro d’agosto bari bambaye imyambaro yiganjemo amabara y’umutuku.

Ibiteg0 cya mbere cyatsinzwe na Silas Daniel Satonho uzwi nka Dany ku munota wa 42 w’umukino, nyuma yo kurekura urutambi rw’ishoti ari hanze y’urubuga rw’amahina bikarangira umupira uruhukiye mu rucundura.

Igitego cya kabiri cya Petro Aletico cyabonetse ku munota wa 80 gitsinzwe n’Umunya-Ghana Isaac Mensah wungukiye ku makosa y’umuzamu na myugariro ba Primeiro d’agosto  basiganiye umupira bikarangira awubatwaye.

Gutsinda uyu mukino byafashije cyane ikipe ya Petro Atletico, kuko yahise ifata umwanya wa kabiri n’amanota 26 aho irushwa rimwe na mukeba.