Tuyisenge Jacques na Gor Mahia bisubije shampiyona ya Kenya ubugira gatatu
Ikipe ya Gor Mahia ikinamo Umunyarwanda Tuyisenge Jacques, yegukanye ihikombe cya shampiyona ya Kenya ku ncuro ya gatatu yikurikiranya. Ni igikombe cya 18 cya shampiyona ya Kenya iyi kipe ibashije kwegukana.
Ni nyuma yo kunganya na Vihiga United igitego 1-1.
Igitego cyo ku munota wa 13 w’umukino cya Charles Momanyi ni cyo cyahesheje iyi kipe ya rubanda nyamwinshi muri Kenya gusubiramo ibyo yakoze muri 2017 na 2018, itwara igikombe cya shampiyona ya Kenya.
Ibi byahuriranye n’uko ikipe ya Bandari FC yari ihanganiye igikombe na Gor Mahia yanganyije igitego 1-1 na Mathare United.
Mu gihe shampiyona ya Kenya ibura imikino ibiri ikarangira, Bandari FC ntiyashobora gukuramo amanota umunani irushwa na Gor Mahia, kabone n’iyo yatsinda imikino yose isigaje Gor Mahia yo yayitsinzwe.
Jacques Tuyisenge yiyongereye ku bandi Banyarwanda; Haruna Niyonzima na Kagere Meddie begukanye igikombe cya shampiyona ya Tanzania ejo hashize bari kumwe na Simba Sports Club.
