Tottenham Hotspurs ikomye mu nkokora umuvuduko wa Chelsea

25/11/201825/11/2018 Kwizera Robby

Kuri uyu wa Gatandatu taliki ya 24 Ugushyingo 2018, imikino ya Shampiyona y’Abongeleza yari yakomeje aho amakipe atandukanye yacakiranye kuri iyi nshuro ikipe ya Chelsea ikaba iraye ihagarikiwe umuvuduko wayo wo kudatsindwa na Tottenham Hotspurs.

Uyu mukino wahuje aya makipe yombi warangiye Chelsea inyagiwe ibitego 3-0.

Mu gice cya Mbere cy’umukino amakipe yombi yatangiye asatirana buri imwe igerageza uburyo yatanga indi kubona igitego, kugeza ubwo ubusatirizi bwa Tottenham Hotspurs bwatangiye kwigaragaza kurusha ubwa Chelsea.

Ku munota wa 8 w’umukino Tottenhma Hotspurs ibifashijwemo na Dele Alli, yaje kubona igitego cya Mbere ku mupira mwiza yari ahawe na Christian Eriksen wanigaragaje cyane muri uyu mukino.

Ku ruhande rwa Chelsea y’umutoza Maurizio Sarri, yagerageje uburyo yongera imbaraga kugira yishyure, gusa biba iby’ubusa kuko ku munota wa 16 kizigenza Harry Kane yayinjije igitego cya kabiri.

Igice cya Mbere cy’uyu mukino cyarangiye Tottenham ifite ibitego 2-0 bwa Chelsea.

Igice cya Kabiri cyatangiye ubona ko Chelsea ifite ingamba zo kwishyura ibitego 2 yari imaze kwinjizwa, nyuma y’iminota 9 gusa, ihabwa gasopo n’igitego cya gatatu yinjijwe na Son Heung-Min ku munota wa 54.

Ku ruhande rwa Chelsea yabonye igitego kimwe rukumbi yatsindiwe na rutahizamu Alvier Giroud ku munota wa 85.

Tottenham ibaye ikipe ya mbere itumye Chelsea iva mu mubare w’amakipe atatu yari akomeje kwesa agahigo ko kudatsindwa na rimwe kuva Shampiyona y’uyu mwaka yatangira.

Amakipe abiri ariyo Manchester City na Liverpool yo akomeje guhagarara ku ishema ryayo yirinda gutsindwa , kuko yanabashije kwitwara neza mu mikino yakinnye uyu munsi, aho Manchester City yihereranye West ham united ikayinyagira ibitego 4-0, mu gihe Liverpool nayo yanyagiye Watford 3-0.

Nyuma y’uko Tottenham yabashije gutsindira Chelsea ibitego 3-1 kuri Stade ya Wembley, byatumye iyi kipe ihigika Chelsea ifata umwanya wa 3 n’amanota 30 mu gihe Chelsea ifite 28.

Kugeza ubu Manchester City ikomeje kuyobora urutonde n’amanota 35, ikurikiwe na Liverpool ifite 33, mu gihe ikipe ya Mnchester United itozwa na Jose Mourinho iri ku mwanya wa 7 n’amanota 21.