Samuel Eto’o ari kwiyamamariza umwanya ukomeye mu mupira w’amaguru muri Cameroun

Rutahizamu watangiye akinira Kadie Sports Academy y’iwabo muri Cameroun akiri muto, nyuma agasinyishwa na Real Madrid muri iyo myaka, ayikinira imikino itatu gusa ya shampiyona mu ikipe ya mbere nyuma akaza no gukinira FC Barcelone na Inter Milan yatangaje ko agiye kwiyamamariza kuyobora FECAFOOT

Uyu mugabo w’imyaka 40, wahoze ari rutahizamu w’ikipe y’Igihugu ya Cameroun, Samuel Eto’o, yiyamamarije kuyobora Ishyirahamwe ry’Umupira w’Amaguru muri icyo gihugu (FECAFOOT).

Samuel Eto’o ibi yabitangaje abinyujije ku mbuga nkoranyambaga ze ku mugoroba wo ku wa Kabiri, avuga ko icyamuteye gufata icyo cyemezo ari urukundo afitiye Cameroun n’uburyo ashaka kwitangira umupira w’amaguru wayo.

Yagize ati “Igihe kiri kugenda gishira. Gutegereza ntibikiri ngombwa. Ni cyo gihe cyo kongera kubaka umupira wacu.”

Amatora ya FECAFOOT biteganyijwe ko azakorwa ku wa 11 Ukuboza, gutanga kandidatire bizarangira ku wa 11 Ukwakira 2021, habura amezi abiri ngo habe amatora.

Eto’o ni uwa gatatu wigeze gukinira ikipe y’Igihugu ya Cameroun ‘Lions Indomitables’ utanze kandidatire yo kwiyamamariza kuyobora ishyirahamwe ryaho rya ruhago.

Nyuma ya Jules Denis Onana na Emmanuel Maboang Kessack, bombi bakiniye Cameroun mu Gikombe cy’Isi cyo mu 1990, na bo bamaze kwiyamamaza kimwe na Seidou Mbombo uyoboye by’agateganyo ndetse na Ivo Chi usanzwe ushakira abakinnyi amakipe.