AmakuruAmakuru ashushye

Rwanda: Abantu 5 biyongeye kubamaze kwandura COVID-19, babiri barayikira

Kuri uyu wa kabiri tariki ya 28 Mata 2020, Minisiteri y’Ubuzima yatangaje ko abantu batanu basanganywe Coronavirus mu bipimo 1505 byafashwe mu gihe babiri basezerewe mu bitaro nyuma yo gusangwa nta bwandu bagifite.

Imibare yo ku wa 28 Mata 2020 yerekana ko abamaze gukira Coronavirus kuva umurwayi wa mbere abonetse mu Rwanda ku wa 14 Werurwe 2020, ari 95 barimo babiri basezerewe uyu munsi.

Itangazo rya Minisiteri y’Ubuzima ryerekanye ko mu bantu 212 bamaze gusanganwa Coronavirus mu Rwanda, barimo ‘batanu bashya’ babonetse mu bipimo 1505 byafashwe kuri uyu wa Kabiri.

Abasanganywe ubwandu biganjemo abakora mu bijyanye n’ubwikorezi cyane mu ‘batwara amakamyo yambukiranya imipaka n’abo bakorana’.

Kugeza ubu abarwayi 117 nibo bari kwitabwaho n’abaganga mu bitaro kandi ‘bose bavurirwa ahantu habugenewe kandi boroherwa.’ Nta murwayi n’umwe uraremba cyangwa ngo yitabe Imana.

Minisiteri y’Ubuzima yibukije abaturage gutanga amakuru ku wo bazi yahuye n’uwanduye Coronavirus kugira ngo yitabweho bikwiye.

Yagize iti ‘‘Umuntu wese wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byayo aba ashyize ubuzima bwa benshi mu kaga kandi abihanirwa n’amategeko.’’

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kuguma mu rugo, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Umuntu wese ashobora kwipimisha akoresheje telefoni akanda *114# agakurikiza amabwiriza. Ugaragaza ibimenyetso bya Coronavirus asabwa guhamagara telefoni itishyurwa ya 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.

Icyorezo cya COVID-19, gituruka ku gakoko gashya ka Coronavirus cyatangiriye mu Mujyi wa Wuhan mu Bushinwa mu Ukuboza 2019; kuri ubu 3 110 696 bamaze kucyandura ku Isi yose, barimo 215 231 cyahitanye na 944 595 bamaze kugikira.

Twitter
WhatsApp
FbMessenger