Ruremesha Emmanuel watozaga Musanze FC yahagaritswe ku mirimo ye
Ruremesha Emmanuel watozaga Musanze FC yo mu majyaruguru y’u Rwanda yahagaritswe imikino 4 ya shampiyona azira umusaruro muke kugira ngo yitekerezeho neza.
Ruremesha yageze muri Musanze FC afatwa nk’umucunguzi nyuma y’uko yari amaze gufasha Etincelles FC kurangiza umwaka w’imikino 2017-2018 iri ku mwanya wa kane (4).
Kuri ubu Ruremesha arazira umusaruro udahagije amaze guha Musanze FC mu mikino 19 ndetse no kuba atabanye neza n’abakinnyi atoza ahanini ngo aho usanga abakinnyi bakuru banarambye muri iyi kipe batavuga rumwe na we.
Musanze FC iri mu makipe ahagaze nabi ugereranyije n’intego batangiranye shampiyona.
Kuva shampiyona yatangira, Ruremesha Emmanuel ntiyigeze afasha Musanze FC kuba yabona amanota yo hanze .
Nyuma y’imikino 19 ya shampiyona, Musanze FC iri ku mwanya wa 12 n’amanota 19 n’umwenda w’ibitego 11 kuko binjije 14 batsindwa ibitego 25. Batsinze itanu (5) banganya ine (4) batsindwa icumi (10).
