Rurageretse hagati ya Sergio Ramos na Florentino Perez uyobora Real Madrid
Amakuru aturuka mu binyamakuru byo muri Espagne avuga ko hari umwuka mubi hagati ya Sergio Ramos usanzwe ari Kapiteni wa Real Madrid na Florentino Perez uyiyobora, kubera igisebo Real Madrid yatewe no gusezererwa na Ajax mu mikino ya UEFA Champions league.
Ku wa kabiri w’iki cyumweru ni bwo urugendo rwa Real Madrid muri Champions league rwarangiye, nyuma yo kunyagirwa na Ajax Amsterdam ibitego 4-1, mu mukino wo kwishyura wa 1/8 cy’irangiza wabereye i Madrid.
Amakuru y’ibinyamakuru birimo AS, Marca, El Pais na ABC avuga ko nyuma y’isezererwa rya Real Madrid, Ramos na Perezida we bashwaniye mu rwambariro ku buryo bukomeye.
Ibi binyamakuru bivuga ko Perez yakangishije Ramos kumwirukana imbere ya bagenzi be bakinana.
Amakuru akomeza avuga ko Sergio Ramos yasubije Perez ko mu gihe yaba amwishyuye ibikumiye mu masezerano bagifitanye, nta kabuza yasohoka muri Real Madrid yatangiye gukinira mu mwaka wa 2005.
Magingo aya uhagarariye Sergio Ramos na Florentino Perez ntacyo baratangaza ku byabaye.
Nk’uko inkuru igaragara mu kinyamakuru AS ibivuga, Florentino Perez yabwiye abakinnyi b’ikipe ya Real Madrid ko imyitwarire bagaragaje imbere ya Ajax mu mukino wo kwishyura ndetse n’iyo bagaragaza batsindirwa mu rugo umusubirizo ari “igisebo gikomeye.”
Ngo aya magambo yarakaje cyane Kapiteni Sergio Ramos utarakinnye uriya mukino wa Ajax kubera ibihano yafatiwe na UEFA.
Nyuma y’uko Perez akangishije Ramos kumwirukana, undi ntiyigeze aripfana kuko yahise amusubiza byihuse.
Ramos yagize ati” Nyishyura ngende. Natanze ibyo mfite byose nanavunika umugongo mbikorera kino kirango, iyi kipe [Real Madrid] ndetse nawe ubwawe.”
Gusezerewa na Ajax Amsterdam byatumye Real Madrid isezererwa muri UEFA Champions league hakiri kare cyane kuva muri 2010. Ibi kandi byasibye agahigo iyi kipe yari ifite ko kumara imyaka itatu yikurikiranya itwara iri rushanwa riruta ayandi i Burayi.
