REG BBC ihagarariye u Rwanda yatangiye imikino nyafurika yitwara neza

Ikipe ya REG BBC ihagarariye u Rwanda mu mikino nyafurika ihuza amakipe yabaye aya mbere muri Basketball izwi nka ‘FIBA Afro-League’, yatangiye itsinda ikipe ya Ferroviario Beira yo mu gihugu cya Mozambique.

Ni umukino warangiye ikipe ya REG itsinze amanota 86-77.

Iri rushanwa rihuje amakipe 16 atandukanye ya hano ku mugabane wa Afurika, riri kubera i Cairo mu Misiri kuva ku munsi w’ejo ku wa gatanu.

REG BBC yatangiye umukino wo ku mugoroba neza, yegukana agace ka mbere kawo ku manota 25 kuri 15 y’Abanya-Mozambique.

Ikipe ya Ferroviario Beira yagarutse mu gace ka kabiri yahinduye imikinire, birangira inakegukanye ku manota 23 kuri 19 ya REG BBC.

REG BBC yagarutse mu gace ka gatatu ikegukana ku manota 21 kuri 15, mbere y’uko Abanya-Mozambique begukana aka nyuma ku manota 28 kuri 17 ya REG. Imbaraga zidasanzwe ikipe ya Ferroviario Beira yagarukanye mu gace ka nyuma zayifashije kugabanya ikinyuranyo cy’amanota yari yatsinzwe, gusa ntiyabasha kwegukana umukino kuko warangiye ku manota 86 ya REG kuri 77.

Engelbert Beleck Bell wa REG yatsinze amanota 25 muri uyu mukino, anakora Rebounds 13.

Ikipe ya REG BBC iragaruka mu kibuga kuri uyu wa gatandatu ikina n’igihangage Primeiro do agosto yo muri Angola, mbere yo gucakirana na Al Ahly yo mu Misiri kuri iki cyumweru.