Real Madrid yihereranye Atletico Madrid iyisanze ku kibuga cyayo (Amafoto)
Ikipe ya Real Madrid yihereranye Atletico Madrid iyitsinda ibitego 3-1, mu mukino wa shampiyona ya Espagne waranzwe n’ishyaka ryinshi ku mpande zombi.
Ni umukino wabereye i Wanda Metropolitano ku kibuga cya Atletico.
Atletico Madrid yaje muri uyu mukino iri ku mwanya wa kabiri ku rutonde rwa shampiyona ya Espagne n’amanota 44, mu gihe Real Madrid yari ifite amanota 42 iri ku mwanya wa gatatu ku rutonde rwa shampiyona iyobowe na FC Barcelona.
Umukino ku mpande zombie watangiranye imbaraga nyinshi, ari na ko abakinnyi bagenda bakora amakosa menshi.
Ku munota wa 16 w’umukino, Real Madrid yafunguye amazamu ibifashijwemo na Casemiro. Ni nyuma ya koruneri yari itewe na Toni Kroos birangira uyu musore ukomoka muri Brazil atsinze igitego nyuma yo kwigarama umupira.
Abasore b’umutoza Diego Simeone bahise bakanguka, bataka Real Madrid bayishakamo igitego cyo kwishyura. Atletico Madrid yishyuye ku munota wa 25 ibifashijwemo na Antoine Griezmann. Hari ku mupira yari acomekewe na Angel Correa birangira awunyujije mu maguru y’umuzamu Thibaut Courtois.
Real Madrid yatsinze igitego cya kabiri ku munota wa 44 ibifashijwemo na Kapiteni Sergio Ramos. Ni igitego yatsinze kuri Penaliti nyuma y’ikosa myugariro Jose Maria Gimenez yari akoreye kuri Viniscius Jr. Iyi yari Penaliti ya 8 Ramos yatsindaga muri iyi season.
Real Madrid y’umutoza Santiago Solari yashoje akazi ku munota wa 74 ibifashijwemo na Gareth Bale wari winjiye mu kibuga asimbura Viniscius. Iki gitego cya gatatu uyu munya Wales yatsinze cyari icy’ijana yari atsindiye Real Madrid.
Ikipe ya Atletico Madrid yarangije uyu mukino isigaranye abakinnyi 10 mu kibuga bonyine, kubera ikarita ya kabiri y’umuhondo yeretswe Umunya-Ghana Thomas Partey.
Iyi derby y’i Madrid yasize Real Madrid ifashe umwanya wa kabiri muri shampiyona n’amanota 45, atanu inyuma ya FC Barcelona ya mbere. Atletico Madrid yo yahise ifata umwanya wa gatatu n’amanota 44.
