Rayon Sports yongeye gucibwa andi mande na CAF izira imyitwarire mibi
Impuzamashyirahamwe y’umupira w’amaguru ku mugabane wa Afurika CAF, yamaze guca amande angana n’arenga miliyoni 4 n’ibihumbi 400 by’amanyarwanda amakipe ya Rayon Sports na Gor Mahia yo mu gihugu cya Kenya kubera imyitwarire mibi yayaranze mu mukino yahuriyemo i Nairobi.
Aya makipe yombi yombi yahuriye mu mukino ubanziriza usoza itsinda S muri CAF Confederations Cup, umukino Rayon Sports yatsindiyemo Gor Mahia ibitego 2-1 kuri Kasarani Stadium i Nairobi.
Ikipe ya Rayon Sports yaciwe aya mafaranga izira imyitwarire Bimenyimana Caleb yagaragaje akoba abafana b’ikipe ya Gor Mahia nyuma y’igitego yari amaze kubatsinda mu minota ya mbere y’umukino.
Mu gice cya kabiri cy’umukino ubwo Eric Rutanga yari amaze gutereka mu rucundura Coup-Franc yatumye Rayon Sports itahukana amanota 3, abafana ba Gor Mahia n’umujinya mwinshi bateye aamcupa menhsi mu kibuga, iki akaba ari cyo cyatumye iyi kipe y’i Nairobi icibwa amande angana n’aya Rayon Sports.
Aya mande Rayon Sports yaciwe aje yiyongera ku yandi menshi yagiye icibwa mu bihe bitandukanye izira imyitwarire mibi ishingiye ahanini ku kutubahiriza amategeko agenga imyambarire muri CAF Confederations Cup, ndetse n’andi angana n’ibihumbi 20 by’amadorali yaciwe izira imvururu abakinnyi bayo bagaragayemo mu mukino w’itsinda yari yahuriyemo na USM Alger.
