Rayon Sports yihagazeho imbere ya USM Alger, mu mukino wasojwe n’imvururu

Umukino wo kwishyura wa CAF Confederations cup wahuzaga ikipe ya USM Alger yari yakiriye Rayon Sports i Blida, warangiye amakipe yombi anguye miswi 1-1, usozwa n’ubushyamirane ku bakinnyi b’impande zombi.

Rayon Sports yagiye gukina uyu mukino abenshi bumva ko ishobora gutsindwa ibitego byinshi, bijyanye n’uko USM Alger yari yayitsindiye i Kigali mu mukino ubanza, ndetse n’umubare muto w’abakinnyi yari yajyanye muri Algeria.

Ismailla Diarra wa Rayon Sports ni we wafunguye amazamu ku munota wa 27 w’umukino, nyuma yo gucika ab’inyuma ba USM Alger. Iki gitego cya Diarra cyafashije Rayon Sports kurangiza igice cya mbere iri imbere na 1-0.

USM Alger yagarutse mu gice cya kabiri yotsa Rayon Sports igitutu, ari na ko igenda iyihushahusha ibitego byinshi. Iyi kipe yashoboraga kubona igitego cyo kwishyura ku munota wa 82, ku mupira Redouane Cherifi yateye umutambiko w’izamu.

Iyi kipe yakomeje kotsa Rayon Sports igitutu, birangira ibonye igitego cyo kwishura cyatsinzwe na Med Amine Hamia, ku mupira yari akatiwe na Yaya Faouzi.

Uyu mukino wakurikiwe n’ubushyamirane hagati y’abakinnyi b’impande zombi zari ziganjemo abakinnyi ba USM Alger bashakaga gukubita Yannick Mukunzi.

Mu wundi mukino w’iri tsinda: Gor Mahia yo muri Kenya yagiye gutsindira Young Africansibitego 3-2 muri Tanzania. ibitego bya Gor Mahia byatsinzwe na George Odhiambo ku munota wa 40′ Jacques Tuyisenge ku wa 53 na Harna  Shakava ku wa 80.

Gor Mahia yahise iyobora iri tsinda n’amanota 8, USM Alger ni iya kabiri n’amanota 8, Rayon Sports ya gatatu ifite 3 mu gihe Young Africans ifite rimwe.

Rayon Sports irasabwa gutsinda imikino 2 isigaje, harimo uwa Gor Mahia uzabera Kasarani n’uwa Yanga uzabera i Kigali igahita ibona tike ya 1/4 cy’irangiza.