Nyuma yo gutsinda West Ham United, Liverpool ibaye ifashe umwanya wa kabiri
Ikipe ya Liverpool ifashe umwanya wa kabiri muri English Premier League yakomezaga ku munsi wa 28, nyuma yo kunyagira West Ham United ibitego 4-1 mbere y’umukino ugomba guhuza Manchester United na Chelsea ushobora guhindura ibintu.
Ibitego bya Emre Can ku munota wa 29, Mohammed Salah ku wa 51, Roberto Firmino ku wa 57 ndetse n’icya Sadio Mane cyo ku munota wa 77 ni byo bifashije Liverpool kuba iraranye umwanya wa kabiri muri shampiyona y’Abongereza.
Ni nyuma yo kwihererana West Ham United yari yayisuye ku kibuga cyayo Anfield Road ikayitsinda ibitego 4-1. Ikipe ya West Ham United yabonye igitego cy’impozamarira ku munota wa 59 w’umukino gitswinzwe na rutahizamu Michel Valencia.
Ibi bivuze ko Liverpool ihise ifata umwanya wa kabiri muri iyi shampiyona n’amanota 57, inota rimwe imbere ya Manchester United. Iyi Manchester United ishobora kwisubiza uyu mwanya mu gihe icyo ari cyo cyose yaba ishoboye gutsinda Chelsea ku munsi w’ejo, gusa mu gihe Chelsea yaramuka iyitsinze Liverpool yakomeza ikawuhamana.
Ku rundi ruhande iyi Chelsea na yo mu gihe yaba itsinze Manchester United, yagira amanota 56 yaba inganya na yo hanyuma bagasigara batandukanyijwe n’umubare w’ibitego bazigamye.
Mu yindi mikino irangiye ni uko
AFC Bournemouth iganyije 2-2 na New Castle United
Brithon & Hove Albion itsinze 4-1 Swan Sea City
Burney inganyije 1-1 na Southampton, mu gihe West Bromwich Albion itsinwe 2-1 na Huddersfield Town.
Iyi shampiyona ikomeje kuyoborwa na Manchester city n’amanota 72, gusa iyi yo ntiyakinnye imikino y’uyu munsi kuko ifite umukino wa nyuma wa Carabao Cup igomba gukinamo na Arsenal.
