Ni bande baba bafatwa nk’abanyabigwi ba El Clasico?
Saa kumi n’imwe na 15 zo kuri iki cyumweru, ruraza kwambikana hagati ya FC Barcelona na Real Madrid. Uyu mukino ujya uhuza aya makipe abiri yahatse andi mu gihugu cya Espagne ni wo uzwi nka El Clasico. Uyu ni wo mukino w’umupira w’amaguru urebwa n’abantu benshi ku isi, kuko urebwa n’abasaga miliyoni 600 ku isi yose.
Muri iyi El Clasico y’uyu mwaka, FC Barcelona na Real Madrid bazaba bahurira mu mukino w’umunsi wa 10 wa shampiyona ya Espagne. FC Barcelona ni yo izaba yakiriye ku kibuga cyayo Camp Nou umwanzi wayo w’ibihe byose ari we Real Madrid.
Iyi El Clasico yo ku munsi w’ejo itandukanye n’izo twari dusanzwe tureba mu myaka irenga 10, kuko ifite umwihariko wo kuba itazagaragaramo abakinnyi 2 bamaze igihe bayoboye ruhago ku isi. Aba ni Cristiano Ronaldo wasohotse muri Real Madrid yerekeza muri Juventus, na Lionel Messi utazagaragara muri uyu mukino kubera ikibazo cy’imvune.
Aba basore kandi ni bamwe mu banyabigwi b’ibihe byose bakoze amateka akomeye muri uyu mukino.
Ubwo tuvuze Messi na Cristiano Ronaldo, reka tubonereho gukomereza kuri bamwe mu bakinnyi bafatwa nk’abanyabigwi muri uyu mukino. Nk’amakipe amaze imyaka irenga 100 ahanganye, birumvikana ko yagiye atunga abakinnyi b’ibihangage gusa si ko bose twabagarukaho, ahubwo twabahitiyemo ab’imgenzi.
Aba banyabigwi reka tubahere kuri Alfredo Di Stefano. Uyu ni umugabo ukomoka mu gihugu cya Argentina unafatwa nk’umwe mu bagize Real Madrid igihangage, mu gihe yari iyoboye Uburayi mu myaka ya za 50. Di Stefano yakinnye El Clasico 30, atsindamo 17, anganyamo 3 mu gihe yatakajemo 10. Di Stefano yatsinze muri Clasico ibitego 18.
Undi munyabigwi ni Johan Cruyf. Uyu mugabo ufatwa nk’umwe mu batazibagirana mu mateka ya FC Barcelona yakinnye El Clasico 8, atsindamo enye, anganay ebyiri anatsindwa ebyiri. Cruyf yatsinze ibitego 3 muri El Clasico.
Undi ufatwa nk’umunyabigwi wa El Clasico ni Diego Maradona. Uyu munya-Argentina ufatwa nk’umwe mu bakinnyi b’ibihe byose yakinnye El Clasico akinira FC Barcelona. Maradona yagize amahirwe yo gukina Clasico 5, atsindamo 3, anganya imwe anatsindwa imwe. Diego Maradona afite ibitego 4 muri El Clasico.
Undi ni kizigenza Zinedine Zidane uzwi nka Zizou. Uyu mugabo ukomoka mu gihugu cy’Ubufaransa ari muri bake bagize umugisha wo kuryoherwa n’imbuto zo mu busitani bwa Real Madrid nk’umukinnyi ndetse n’umutoza. Zinedine Zidane yakinnye Clasico 11, atsindamo 4, anganyamo izindi 4, mu gihe yatsinzwemo 3. Zidane afite ibitego 3 muri El Clasico.
Undi tutarenza ingohe ni Cristiano Ronaldo. Uyu mugabo wakiniye Real Madrid mu gihe cy’imyaka 9 yagaragaye muri El Clasico 30. Ronaldo yashoboye kwegukana insinzi 8 zonyine muri uyu mukino, awunganya izindi 8 mu gihe yawutsinzwe incuro 14. Cristiano Ronaldo yatsinze ibitego 18 ahura na FC Barcelona.
Nyuma ya Cristiano Ronaldo haza Lionel Messi. Akinira FC Barcelona, akaba ari we ufite agahigo ko gutsinda ibitego byinshi muri uyu mukino. Lionel Messi amaze gutsinda Real Madrid ibitego 26. Ibi bitego yabitsinzemu mikino ya Clasico 38 amaze gukina. Messi akina na Real Madrid yashoboye kuyitsinda incuro 17, anganya na yo 9 imutsinda incuro 12.
