AmakuruImikino

Neymar yemeye kugabanya umushahara we kugira ngo afashe FC Barcelona kumugura

Umunya-Brazil Neymar Jr yamaze kumvikana na FC Barcelona yahoze akinira, kugira ngo ayisubiremo muri iyi mpeshyi avuye muri PSG yo mu Bufaransa.

Amakuru akomeje kuvugwa mu bitangazamakuru byo muri Espagne no mu Bufaransa, avuga ko uyu musore yifuza gusubira i Barcelone aho yavuye mu myaka ibiri ishize akajya muri PSG.

Uyu musore yanamaze kubwira umukoresha we Nasser Al-Khelaifi ko atagishaka gukinira PSG, ko icyo ashaka ari ugusubira iwabo mu rugo [muri FC Barcelona] atakabaye yaravuye.

Ikinyamakuru Sport cyanditse ko Neymar yemeye kugabanya umushahara yahembwaga na PSG, mu rwego rwo gufasha FC Barcelona kumugura muri PSG ngo kuko azi neza ko hakenewe amafaranga menshi kugira ngo agere ku ndoto ze.

Magingo aya Neymar ahembwa na PSG miliyoni 32 z’amapawundi ku mwaka, gusa ngo agiye muri FC Barcelona yakwemera guhembwa angana n’ayo yahembwaga akiyikinira. Amakauru avuga ko Neymar aramutse asubiye muri FC Barcelona yasinya amasezerano y’imyaka itanu, ndetse akajya ahembwa umushahara wa miliyoni 21 z’amapawundi ku mwaka.

Sport yanavuze ko Neymar aramutse agiye muri FC Barcelona, byarangiye arekeye iyi kipe uduhimbazamusyi tungana na miliyoni 23 z’amapawundi akiyishyuza.

Mu gihe kujya muri FC Barcelona byaba byanze, Neymar ashobora kujya muri Real Madrid yagaragaje ko imwifuza cyangwa Manchester United na yo ikomeje kumwirukankaho.

Twitter
WhatsApp
FbMessenger