Napoli yirukanye umutoza wayo Carlo Ancelotti nyuma yo gukomeza muri Champions League
Ikipe ya Napoli yo mu Butaliyani yamaze kwirukana umutoza wayo Carlo Ancelotti nta nyuma y’amasaha make imaze gutsinda Genk muri Champions League bikanayihesha gukomeza muri 1/8 cy’irushanwa.
Ni nyuma y’aho uyu mutoza yari amaze imikino 9 atabona insinzi mu marushanwa yose yo muri shampiyona y’Ubutaliyani izwi nka Serie A.
Uyu wari umwaka wa kabiri umutoza Carlo Ancelotti atoza Napoli kuri ubu iri ku mwanya wa 7 ku rutonde rw’agateganyo rwa shampiyona.
Mu kwezi gushize umutoza ndetse n’abakinnyi bari bagiranye amakimbirane na perezida w’ikipe ya Napoli Aurelio de Laurentis ubwo yategekaga ko abakinnyi bose bagomba kujya mu mwiherero ariko bose bakitahira n’umutoza wabo byanabaye intandaro yo kutitwara neza mu mikino y’imbere mu gihugu n’ubwo muri Champions League irimo kwitwara neza.
Amakuru yatangiye kuvugwa n’ibitangazamakuru byo ku mugabane w’Uburayi ni uko Ancelotti ashobora guhita ajya gushaka akazi muri Arsenal na Everton zo mu Bwongereza zidafite abatoza kuko nazo ziherutse kubirukana mu minsi mike ishize.
Carlo Ancelloti yatunguwe nyuma yo gutsinda ikipe ya Genk yo mu Bubiligi ibitego 4-0 kuko bigaragara nk’aho yari yongeye kwigarurira ikizere biciye mu magambo yabwiye itangazamakuru.
Yagize ati “Insinzi yo muri iri joro iraturuhuye kandi iratuma abakinnyi bongera kwigarurira ikizere mu gihe kiri imbere. Ku bwange mu gihe hari abakinnyi bari kugaruka kandi hagize ibikosorwa iyi kipe iracyashobora kugaruka ku mwanya wa kane.”
Yongeyeho ati “Nzavugana na Perezida w’ikipe Laurentiis ejo (uyu munsi) hanyuma dufate icyemezo kibereye Napoli.”
Nyuma y’aya magambo ubuyobozi bwa Napoli bwo ntibwigeze buyitaho kuko mu masaha agera kuri 3 bunyuze kuri Twitter bwanditse ubutumwa bumenyesha ko Ancelloti yasezerewe mu ikipe.
Ubutumwa bugira buti “SSC Napoli yafashe icyemezo cyo gutandukana n’umutoza w’ikipe nkuru Carlo Ancellotti. Ubucuti n’ubwubahane hagati y’ikipeperezida Aurelio Laurentiis n’umutoza Carlo Ancelotti bizakomeza nta gihindutse na gito.”
Amakuru aravugwa ko yaba agiye gusimbuzwa umutoza Gennaro Gattuso wahoze atoza AC Millan umwaka ushize.
