Miss Rwanda 2019: Umukobwa wa mbere yamaze gusezererwa

Ku mugoroba w’iki cyumweru tariki 20 Mutarama 2019, umukobwa wa mbere muri 20 bari mu mwiherero i Nyamata yasezererwe ari nako irushanwa rikomeza kugana ahakomeye kuko hagitegerejwe abandi bane bazataha hagasigara 15 bazagera ku munsi wa nyuma w’irushanwa.

Umukobwa witwa Higiro Joally warangwaga n’umubare nimero 15, niwe wabimburiye abandi mu gutaha  mu bakobwa batanu bagomba gusezererwa mbere y’uko haba Final izatorerwamo Nyampinga w’u Rwanda w’umwaka wa 2019 uzasimbura Miss Iradukunda Liliane ufite ikamaba rya 2018.

Uyu mukobwa asezerewe mu gihe, amatora yabaye kuri iki cyumweru hifashishijwe uburyo bwa SMS za Telefone, yarangiye ari ku mwanya wa 14 n’amanota 896.

Ku mugoroba w’iki cyumweru, abakobwa bose uko ari 20 bari mu mwiherero i Nyamata kuri Golden Tulip Hotel basabwe n’abategura irushanwa rya Miss Rwanda kuzinga ibikoresho byabo byose mbere y’uko hatangazwa umukobwa wasezerewe. Ibi bisobanuye ko uwasezerewe yahise ataha iri joro.

Higiro Joally wasezerewe yinjiye mu irushanwa ry’uyu mwaka ahagarariye Intara y’Uburasirazuba.

Ni ukuvuga ko nyuma ya Higiro Joally guhera kuwa kane w’iki Cyumweru buri munsi hazajya hasezererwa umukobwa umwe kugeza hasigayemo 15.

Biteganyijwe ko Nyampinga w’u Rwanda w’uyu mwaka azamenyekana tariki 26 Mutarama 2019 mu birori bizabera i Rusororo mu Intare Conference Arena.