Manchester City yatangiye Premier league iha isomo rya ruhago West Ham United
Ikipe ya Manchester City ifite ibikombe bibiri bya shampiyona y’Abongereza biheruka, yatangiye shampiyona y’umwaka wa 2019/2020 inyagira West Ham United ibitego 5-0.
Ni ibitego birimo bitatu byatsinzwe na Raheem Sterling, mu gihe ibindi bibiri byatsinzwe na Gabriel Jesus cyo kimwe na Sergio Aguero watsinze igitego cya gatanu ku munota wa 86 kuri penaliti.
Ni umukino Man City yarushijemo West Ham mu buryo bugaragara.
Gutsinda uyu mukino byashimangiye ko ikintu cyose Liverpool yakora, Manchester City iza ikagikora neza birenzeho. Ni nyuma y’uko Liverpool na yo yatangiye neza shampiyona inyagira Norwiich City ibitego 4-1.
Kuba aya makipe yombi yari ahanganiye igikombe cya shampiyona y’umwaka ushize kugera ku munota wa nyuma none akaba yatangiye atsinda, bisobanuye nanone ko urugamba rw’uzegukana Premiel league y’uyu mwaka na rwo rushobora kuzaba indya nkurye.
