AmakuruImikino

Man City yihanije Watford, yandika amateka atarakorwa n’indi kipe mu Bwongereza

Ikipe ya Manchester City ibaye ikipe ya mbere ishoboye kwegukana ibikombe bitatu bikinirwa mu Bwongereza mu mwaka umwe w’imikino, nyuma yo kunyagira mu buryo bukomeye Watford ku mukino wa nyuma wa FA Cup.

Uyu mukino waberaga kuri Stade y’igihugu y’u Bwongereza Wembley, warangiye Manchester City inyangiye Wattford ibitego byose bitandatu ku busa.

Muri ibi bitego harimo bitatu byatsinzwe na Raheem Sterling wenyine. Ibi bitego uyu musore yatsinze byatumye aca agahigo ko kuba umukinnyi rukumbi ushoboye kubitsinda ku mukino wa nyuma wa FA Cup kuva mu 1953. Ni ukuvuga nyuma y’imyaka 66 yose ishize.

Umunya-Espagne David Silva, Umubiligi Kevin De Bruyne n’Umunya-Brazil Gabriel Jesus na bo babonye izamu muri uyu mukino.

Ni umukino Manchester City y’umutoza Pep Guardiola yarushijemo Watford mu buryo bugaragarira buri wese.

Gutsinda ibitego 6-0 ku mukino wa nyuma wa FA Cup byo byatumye Manchester City ica agahigo kari kamaze imyaka 116 yose. Ibitego nk’ibi ku mukino wa nyuma wa FA Cup byaherukaga kuboneka mu wa 1903 ubwo Bury yatsindaga Derby County.

Igikombe cya FA Cup Manchester City imaze gutwara kije kiyongera ku cya Carabao n’icya shampiyona y’Abongereza yegukanye muri uyu mwaka.

Ni igikombe cya gatandatu cya FA Cup Manchester City itwaye mu mateka yayo, ndetse n’icya mbere itwaye iri kumwe na Pep Guardiola umaze gutwarana na yo ibikombe bitandatu mu gihe cy’imyaka itatu ayimazemo.

Gutwara iki gikombe bisobanuye ko Wolves yarangije shampiyona y’Abongereza iri ku mwanya wa karindwi yabyungukiyemo, kuko yabonye amahirwe yo gukina imikino y’amajonjora ya Europa league.

Twitter
WhatsApp
FbMessenger