Luis Enrique yahamagaye ikipe Espagne izakoresha muri shampiyona itarimo Jordi Alba

Luis Enrique, umutoza w’ikipe y’igihugu ya Espagne La Furia Roja, yahamagaye ikipe agomba kwifashisha mu mikino 2 Espagne iteganya gukina, itarimo Jordi Alba wa FC Barcelona.

Iyi kipe ifite imikino 2 ya shampiyona y’ibihugu byo ku mugabane w’Uburayi igomba gukina, harimo uwo igomba guhuriramo n’Abongereza ku wa 8 Nzeri i Wembley, ndetse n’uwo izakinamo na Croatia ku wa 11 Nzeri.

Ikipe umutoza Enrique yahamagaye ntirimo Andres Iniesta na Gerard Pique bamaze gusezera, gusa icyatunguye abantu benshi ni ukudahamagarwa kwa Jordi Alba usanzwe ukina inyuma ku ruhande rw’ibumoso muri Barcelona akaba n’umukinnyi wari umenyerewe kuri uyu mwanya mu kipe ya Espagne.

Abakurikiranira hafi iby’aba bagabo bombi[Alba & Enrique] bemeza ko impamvu atamuhamagaye atari uko uyu musore afite ikibazo runaka, ko ahubwo ari uko yakunze kumunga cyane ko ari umutoza udashoboye ubwo bari bakiri kumwe mu kipe ya FC Barcelona.

Iyi kipe igaragaramo Sergi Roberto wa FC Barcelona utaragize amahirwe yo gukina igikombe cy’isi, we na Sergio Busquets bakaba ari bo bakinnyi rukumbi ba Barcelona bayirimo.

Abakinnyi Luis Enrique agomba kwifashisa muri iyi mikino.

Abazamu:  David De Gea(Man United), Kepa(Chelsea), Pau López(Real Betis).

Abakina inyuma: Dani Carvajal(Real Madrid) , Cesar Azpilicueta(Chelsea) , Raúl Albiol(Napoli), Diego. Llorente(Real Sociedad), Nacho Fernandes (Real Madrid), Sergio Ramos(Real Madrid) , Ínigo Martínez(Bilbao), M. Alonso(Chelsea), Gayá(Valencia)

Abakina hagati:  Sergio Busquets(Barcelona), S. Roberto(Barcelona), Rodri Hernandes (Atletico), Saúl Niguez(Atletico), Thiago Arcantala (Bayern), Dani Ceballos(Real Madrid)

Abataha izamu: Isco(Real Madrid), Marco Asensio(Real Madrid), Arvalo Morata(Chelsea), Diego Costa(Atletico), Suso(AC Milan) , Rodrigo Moleno(Valencia).