Lionel Messi yaciye kuri Cristiano Ronaldo ku mubare w’ibitego batsindiye Club

Umunya-Argentine Lionel Messi yaraye yujuje ibitego 608 amaze gutsindira FC Barcelona, atambuka kuri Cristiano Ronaldo bahora bahanganye watsindiye amakipe yose yakiniye (Clubs) ibitego 606.

Ibi uyu Kapiteni wa FC Barcelona yabigezeho ubwo Barca yanyagiraga Real Valladolid ibitego 5-1, mu mukino w’umunsi wa gatanu wa shampiyona ya Espagne wabereye i Camp Nou.

Messi muri uyu mukino yatsinzemo ibitego bibiri, byatumye arusha Cristiano Ronaldo ibitego bibiri, dore ko bombi bari baratsindiye Clubs zabo ibitego 606. Ibi bitego byose Messi yabitsinze mu mikino 695, mu gihe ibyo Cristiano yatsinze yabashije kubitsinda mu mikino 813.

Byumvikana ko Messi yatsinze ibi bitego 608 mu gihe gito cyane kurusha Ronaldo watsinze 606 amurusha imikino 113.

Ibi biraca amarenga y’uko uyu munya-Argentine ashobora kuzahagarika gukina umupira w’amaguru arusha mukeba we umubare w’ibitego yatsinze, nijyanye n’uko anamurusha imyaka ibiri yose.

Igitego cya mbere Lionel Messi yagitsinze kuri Coup-Franc yo ku munota wa 34, mbere yo gutsinda ikindi gitego ku munota wa 75 w’umukino. Ni ibitego byaje nyiyongera ku cya Clement Lenglet cyo ku munota wa kabiri, icya Artulo Vidal cyo ku munota wa 29 n’icy’agashinguracumu cyatsinzwe na Suarez ku munota wa 77 w’umukino.

Ibi bitego bitanu byatumye FC Barcelona ikomeza kuyobora shampiyona ya Espagne n’amanota 22, ikarusha Granada ya kabiri amanota abiri.

Real Madrid igomba gukina Leganes mu ijoro ryo kuri uyu wa gatatu yo iri ku mwanya wa gatandatu n’amanota 18.