Kevin Durant agiye kuva muri Golden State Warriors
Kevin Wayne Durant yatangaje ko agiye kwerekeza muri Brooklyn Nets, agatandukana na Golden State Warriors yafashije kwegukana ibikombe bibiri byikurikiranya bya shampiyona ya Baksetball muri Amerika, NBA.
Biravugwa ko KD w’imyaka 30 ashobora guhabwa miliyoni $164 ku masezerano y’imyaka ine. KD (Kevin Durant) yabaye MVP inshuro ebyiri mu 2017 na 2018 ubwo Golden State Warriors yatwaraga ibikombe bya shampiyona y’ikurikiranya.
Kevin Durant avuye muri Golden State Warriors afite imvune yakuye mu mukino wa gatanu Golden State Warriors yahuyemo na Toronto Raptors hakinwa imikino ya nyuma ya NBA Finals, hari nyuma yo kumara ukwezi kurenga na bwo yaravunitse, KD ashobora kumara umwaka wose w’imikino wa 2019/20 adakinnye.
Kevin Durant yageze muri Warriors avuye muri Oklahoma City Thunder mu 2016, aho yatsinze impuzandengo y’amanota 25.8, asama imipira 7.2, ari na ko atanga indi 5.4 kuri bagenzi be mu gihe cy’imyaka itatu yari amaze muri Oakland.
Brooklyn Nets yegukanye Durant ihigitse Golden State Warriors yifuzaga kumugumana mu myaka itanu, imuhaye miliyoni $221. Andi makipe yamwifuzaga ni New York Knicks na Los Angeles Clippers.
