AmakuruUbukungu

Jeff Bezos yatangaje akayabo ka miliyari yungutse muri iki gihe cya Coronavirus

Muri iki gihe rubanda nyamwishi bari gutaka ubukene batewe n’ibi bihe isi yugarijwe n’icyorezo cya Coronavirus, kuri ubu umukire wa mbere kw’isi Jeff Bezos yatangajeko umutungo we wiyongereyeho miliyari 24 z’amadolari y’Amerika muri ibi bihe Isi yugarijwe n’icyorezo cya Coronavirus.

Ubwiyongere bw’umutungo wa Jeff Bezos byatewe n’uko urubuga rwa Amazon abantu barimo kurukoresha cyane mu bikorwa byo guhaha muri ibi bihe bidasanzwe by’akato muri gahunda ya Guma Mu Rugo (#Stayathome) mu kwirinda ikwirakwira rya Covid-19.

Ubu, Jeff Bezos w’imyaka 56, afite umutungo ubarirwa muri Miliyari 138 z’amadolari y’Amerika, nk’uko bitangazwa na Bloomberg Billionaires Index.

Byatumye ashimangira umwanya we nk’umuntu wa mbere ukize cyane ku isi.

Kompanyi ye yungukiye cyane ku kuba abantu ku isi bari kuguma mu ngo zabo bagatumiza ibyo bacyeneye kuri internet, muri iki gihe cy’icyorezo cya Covid-19.

Byabaye ngombwa ko iha akazi abakozi babarirwa mu bihumbi kugira ngo ibashe guhaza abakiliya bayo biyongereye cyane muri iki gihe.

Bezos afite imigabane ingana na 11% muri Amazon, kandi ejo ku wa kabiri, imigabane yayo yiyongereyeho 5.3%.

Umuryango nyir’ikigo cy’ubucuruzi cya Wal-Mart, gifite iduka rya Asda mu Bwongereza, na wo warungutse muri iki gihe cy’ibihe bidasanzwe by’akato.

Bloomberg Billionaires Index itangaza ko kugeza ubu muri uyu mwaka, abaherwe 500 ba mbere ku isi bamaze guhomba agera kuri miliyari 553 z’amadolari y’Amerika.

Twitter
WhatsApp
FbMessenger