Ismaila Diarra yamaze gutandukana na Rayon Sports
Umunye-Mali wakiniraga Rayon Sports asatira izamu yamaze gutandukana n’iyi kipe yerekeza muri Algeria mu ikipe ya CA Bordj Bou Arréridj yasinyemo imyaka itatu.
Ikinyamakuru cyo muri Algeria cyitwa Algeria DZFOOT gikunze kwandika amakuru y’imikino, cyatangaje ko uyu Ismaila Diarra yamaze kumvikana n’iyi kipe yamurambagije ndetse no ku mpande z’amakipe yombi bamaze kumvikana ariko amafaranga batanze kuri Diarra wari ugifite amasezerano y’umwaka umwe muri rayon Sports ntibyatangajwe.
Iyi kipe ya CA Bordj Bou Arréridj Diarra yerekejemo yakinaga mu cyiciro cya kabiri ariko yabonye itike yo kuzamuka mu kiciro cya mbere mu mwaka w’imikino wa 2018/2019.
Ismaila Diarra yatandukanye na Rayon Sports mu 2016 yerekeza muri DR Congo mu ikipe ya Darling Club Motema Pembe aho yayikinnyemo umwaka umwe gusa maze umwaka w’imikino wa 2017 /2018 ahita agaruka muri Rayon Sports.
Nkuko amakuru ava muri Algeria abivuga, ngo iyi kipe yabengutse Diarra ubwo Rayon Sports yakinaga imikino ya CAF Confederations Cup n’ikipe ya USM Alger yatsinzemo ibitego bibiri mu mukino wo ubanza n’uwo kwishyura.
