AmakuruAmakuru ashushyeImikino

Inkuru nziza ku bakunzi ba FC Barcelona: Lionel Messi yagarutse mu myitozo(Amafoto)

Lionel Messi, Kapiteni w’ikipe ya FC Barcelona wari witezwe kumara hanze y’ikibuga byibura ibyumweru 3 yagarutse mu myitozo, nyuma y’imvune yari yaragiriye mu mukino wa shampiyona ikipe ye yatsinzemo FC Seville.

Messi w’imyaka 31 y’amavuko, yavunitse akaboko ubwo FC Barcelona yakinaga na Seville mu mukino w’umunsi wa 9 wa shampiyona ya Espagne. Ni umukino warangiye FC Barcelona itsinze ibitego 4-2 harimo n’icyo yatsinze ku munota wa 12 w’umukino.

Amakuru yatanzwe n’abaganga b’ikipe ya FC Barcelona yavugaga ko Messi ashobora kumara hanze y’ikibuga byibura ibyumweru 3, agasiba imikino itandatu. Messi wagarutse mu myitozo, ntiyagaragaye mu mukino wa UEFA Champions league ikipe ye yatsinzemo Inter Milan 2-0 ndetse, n’uwa El Clasico Barcelona yanyagiyemo Real Madrid 5-1.

Amafoto ikipe ya FC Barcelona yasangije kuri Twitter yayo agaragaza Messi ari mu myitozo kumwe na bagenzi be.

Lionel Messi ntaza kugaragara mu mukino w’igikombe cy’umwami FC Barcelona iza gukinamo na Cultural Leonesa kuri uyu wa gatatu, gusa byitezwe ko mu mukino wa shampiyona iyi kipe izakina na Rayo Valcano Messi azaba ari ku ntebe y’abasimbura.

Byitezwe kandi ko Messi agomba kugaragara neza mu mukino wa UEFA Champions league FC Barcelona izahuriramo na Inter Milan i San Siro. Uyu mukino uteganyijwe kuba ku wa kabiri w’icyumweru gitaha.

Lionel Messi mu myitozo.

 

Twitter
WhatsApp
FbMessenger