AmakuruAmakuru ashushye

Imibare kuri COVID-19: Abayanduye, abo yishe n’abayikize mu bihugu bitandukanye

Leta Zunze Ubumwe za Amerika zageze ku bantu 40,565 bamaze kwicwa n’icyorezo cya Coronavirus, nyuma y’aho mu masaha 24 ashize abantu 1561 bishwe na cyo.

Ibi byatumye iki gihugu gikomeza kuza imbere ku Isi mu bikomeje kugira umubare w’abamaze gupfa no kwandura, kuko ubu abantu 764,265 bamaze kwandura mu gihe 71,012 aribo bamaze gukira.

Nubwo abapfa muri iki gihugu bakomeje kwiyongera, abaturage bo bakomeje kwigabiza imihanda basaba ba guverineri ba za leta zimwe ko bakuraho ibikorwa byo kuguma mu ngo.

Kuri iki Cyumweru iyi myigaragarambyo yagaragaye muri leta za Arizona, Corolado, Montana na Washington.

Perezida Donald Trump nawe agaragaza ko ashyigikiye ko ibikorwa byo gufungira abaturage mu ngo bigenda bigabanywa, ibintu atavugaho rumwe n’abayobozi batandukanye muri iki gihugu.

Mu gihugu cya Afghanistan giherereye muri Aziya, ho abantu 40 bakora mu biro by’umukuru w’igihugu, Ashraf Ghani, basanganwe Coronavirus.

Kugeza ubu ntibiratangazwa niba perezida Ghani w’imyaka 70 yaba nawe yaranduye.

Abanduye muri iki gihugu ni 996 mu gihe 33 bamaze gupfa.

Ishami ry’Umuryango w’Abibumbye ryita ku Buzima, OMS, riratangaza ko kugeza ubu abanduye Coronavirus ku Isi bageze ku 2 407 600, abamaze gupfa ni 165 083 naho abamaze gukira ni 625 312.

Ibihugu bifite abanduye ndetse n’abapfuye benshi, ku mwanya wa mbere haracyari Leta Zunze Ubumwe za Amerika, Espagne iri ku mwanya wa kabiri kuko ifite abantu 198 674 bamaze kwandura naho 20 453 bamaze gupfa, u Butaliyani bufite abanduye 178 972 mu gihe 23 660 bamaze gupfa.

Mu Bufaransa abantu 152 894 bamaze kwandura, abandi 19 718 bamaze gupfa.

U Budage bufite abanduye 145 742mu gihe 4 642 bapfuye, u Bwongereza bufite abanduye 120 067 ariko abamaze gupfa ni 16 060.

Ku Mugabane wa Afurika, abantu 22 992 ubu bamaze kwandura Coronavirus, abamaze gupfa bageze ku 1 128.

Kugeza ubu Afurika y’Epfo yaje imbere n’abamaze kwandura benshi kuko ari 3 158 mu gihe abamaze gupfa ari 54, ikurikirwa na Misiri ifite abanduye 3 144 abapfuye ho bageze kuri 239.

Algeria niho hamaze gupfa abantu benshi muri Afurika kuko ari 375 mu gihe abamaze kwandura ari 2629.

Muri Afurika y’Iburasirazuba, Kenya niyo ikomeje kugira abanduye benshi kuko ubu bageze kuri 270 mu gihe abamaze gupfa ari 14 , mu Rwanda hamaze kuboneka abantu banduye 147 ariko abamaze gukira bageze kuri 76 nta mutu n’umwe irahitana, Uganda baracyari 55, muri Tanzania hamaze kuboneka abantu 170 hamaze gupfa barindwi, mu Burundi habonetse batanu, hamaze gupfa umwe mu gihe muri Sudani y’Epfo ari bane banduye.

Twitter
WhatsApp
FbMessenger