Ikipe y’igihugu ya Tanzania yabimburiye andi mu kwerekeza mu Misiri (Amafoto)

Ikipe y’igihugu ya Tanzania Taifa Stars, yabimburiye andi makipe mu kwerekeza mu gihugu cya Misiri ahazabera irushanwa ry’igikombe cya Afurika giteganyijwe gutangira ku wa 21 z’uku kwezi.

Kuri uyu wa gatanu ni bwo iyi kipe itozwa n’Umunya-Nigeria Emmanuel Amunike yahagurutse ku kibuga cy’indege cya Dar Es Salaam yerekeza mu gihugu cya Misiri. Abakinnyi b’iyi kipe bari barimbye amakoti y’akataraboneka. Ikipe ya Tanzania yahagurutse i Dar Es Salaam igizwe n’abakinnyi 30 bayobowe na kabuhariwe Mbwana Samatta ukinira Genk yo mu Bubiligi.

Nyuma yo kugera mu Misiri, Tanzania izahakinira imikino ibiri ya gicuti, harimo uwo izakina n’ikipe y’igihugu ya Misiri ndetse n’uwo izakina na The Warriors ya Zimbabwe.

Tanzania iri mu tsinda rya gatatu isangiye n’ibihugu bya Algeria ya ba Riyad Mahlez, Senegal ya ba Sadio Mane na Kenya ya ba Victor Wanyama.