Igisirikare cya Uganda n’icya Congo byatangaje umubare w’ibyihebe bya ADF byafashe mpiri
Igisirikare cya Uganda n’icya Repubulika Iharanira Demokarasi ya Congo, byatangaje ko kuva bitangije ibikorwa bya gisirikare byo guhiga bukware abarwanyi b’umutwe wa ADF byafashe 34 muri bo.
Ku wa 30 Ugushyingo ni bwo ingabo z’ibihugu byombi zatangiye kugaba ibitero ku birindiro by’inyeshyamba za ADF.
Umuvugizi w’Igisirikare cya Uganda, Brig Flavia Byekwaso n’uw’icya Congo Kinshasa, Gen Maj Kasonga Chibangu Léon, batangaje ko kuva biriya bikorwa byatangira hari abarwanyi 34 ba ADF bafashwe mpiri.
Bavuze kandi ko hari abaturage 31 bari barafashwe bugwate babohowe ndetse n’ibirindiro bine bya ADF ingabo za Uganda n’iza RDC zashenye.
