Ibyo wamenya kuri ‘El Classico’, umukino uhuza FC Barcelona na Real Madrid uraza kuba uyu munsi

Kuri uyu wa 18 Ukuboza 2019 hateganyijwe umukino w’ishyiraniro hagati y’amakipe abiri y’ubukombe mu gihugu cya Espagne no ku isi ariyo FC Barcelona na Real Madrid. Umukino isi yose izi ku izina rya “El Classico”. Ni amakipe ari mu ya mbere haba mu bigwi byayo ndetse ku mafaranga.

Ni amakipe y’amakeba ahora arangwa no guhangana bigatuma umukino uyahuza isaha yawo ijya kugera wavugishije amagambo menshi abantu bibaza uko uza kugenda bitewe n’amateka n’ibigwi bya buri imwe usanga biba bijya kungana ntayo wavuga irusha indi ku buryo bugaragara.

Ibi bigaragazwa n’uko izi zombi mu myaka irenga 10 ishize ari zo zari zifite abakinnyi ba mbere ku isi mu mupira w’amaguru aribo Lionel Messi wa Barcelona na Cristiano Ronaldo wa Real Madrid kuri ubu wamaze kuyivamo akerekeza muri Juventus yo mu Butaliyani.

Uguhangana kw’aya makipe yombi  ahanini gushingiye ku mateka ya Politiki yaranze igihugu cya Espagne cyane cyane ku ntara ya Catalonya (Catalunha) FC Barcelona ibarizwamo imaze igihe kinini ishaka kwiyomora kuri iki gihugu ikigenga aho kuyoborwa na Leta ya Espagne ifite icyicaro mu mujyi wa Madrid ari naho Real Madrid ibarizwa.

Abakinnyi b’aya makipe yombi uko ari babiri, Messi na Ronaldo bari bafite imipira 10 ihabwa umukinnyi wahize abandi mu mwaka, igihembo kizwi nka ‘Ballon d’Or’ aho buri umwe yari afite Ballon d’Or 5 mbere y’uko Messi atwaye iya 6 kuva aho Cristiano aviriye muri La Liga akerekeza muri Serie A mu Butaliyani.

Umukino w’uyu munsi uraba uyobowe n’aba kapiteni b’aya makipe yombi Lionel Messi na Sergio Ramos, myugariro ukomeye wa Real Madrid uraba ukina El Classico ye ku nshuro ya 43 naho abatoza ni Ernesto Valverde na Zinedine Zidane wa Real Madrid, umufaransa wanabaye icyamamare mu mupira w’amaguru. Umukino wo uraza kubera kuri stade Camp Nou ya FC Barcelona.

Ni umukino wa shamiyona ya Espagne uraza kuba usubukurwa nyuma y’amezi 2 usubitswe kuko wagomaga kuba mu kwezi kwa 10 ariko uza gusubikwa kubera imyigaragambyo ikomeye yabereye I Barcelona aho abigaragambya bamaganaga icyemezo cyo gufunga abagabo bagera ku 9 baharaniraga ubwigenge bw’intara ya Catalunha aho Leta ya Espagne yabashinjije guteza imyivumbagatanyo mu gihugu.

Aya makipe yombi ubu aranganya amanota 35 ku rutonde rw’agateganyo rwa shampiyona igeze ku munsi wayo wa 35 aho buri kipe iraba ishaka intsinzi kugirango irushe iyindi inayiceho ku rutonde ineyirushe intsinzi dore ko nk’uko twabivuze zitajya zitandukana cyane mu bigwig byazo kuko zombi mu mikino yazihuje mu mateka ya shampiyona buri imwe ifite intsinzi y’imikino 73.

Ni umukino biteganyijwe ko uza kuba urebwa n’abafana b’aya makipe yombi bagera kuri miliyari 3 baba abaraba bari kuri stade ndetse n’abawurebera ku matereviziyo ku isi yose nk’uko Super Sport yabitangaje.

Bitewe n’uburyo aya makipe akenera umutekano uhagije kuri ubu mu kwitegura uyu mukino yacumbikishijwe muri Hotel imwe aho biteganyijwe ko araza guhagurukira rimwe yerekeza ku kibuga mbere y’amasaha 2 ngo umukino utangire ugomba kuba isaa tatu z’ijoro (21h00’) ari nako zicungiwe umutekano.

Lionel Messi ategerejwe na benshi ku buryo aritwara kuri uyu mukino dore ko adaheruka kubona igitego mu mikino 3 iheruka guhuza aya makipe yombi bityo akaba ategerejwe nyuma yo gutwara Ballon d’Or y’uyu mwaka dore ko ari nawe mukinnyi ufite ibitego byinshi mu mateka ya Classico.

Messi araba afatanya na Suarez, na Griezman mu busatirizi bwa Barcelona mu gihe ubwa Real buyobowe na Gareth Bale na Benzema.

Ikindi wamenya ni uko kapiteni wa Real Madrid, Sergio Ramos ariwe mukinnyi uraba umaze gukina El Classico nyinshi kuko uyi araba ari iya 43 agaragayemo akaba araza guca ku bakinnyi nka Manolo Sanchis, Francisco Gento na Xavi bombi bakinnye El Classico 42.

Abakinnyi 3 ba mbere bayoboye abandi mu gutsinda ibitego byinshi muri uyu mwaka bagiye guhurira mu mukino umwe ni Karim Benzema wa Real ufite ibitego 12, Lionel Messi afite 12 nawe naho Luis Suarez wa Barcelona afite ibitego 10.