Ibyamamare byo muri Nigeria byahagurukiye ihohoterwa ryibasiye abanyamahanga muri Afurika y’Epfo
Nyuma y’uko abaturage b’abanyamahanga bari muri Afurika y’Epfo bakomeje gukorerwa ihohoterwa rikabije, ibyamamare bitandukanye byo muri Nigeria byahagurukiye kwamagana uru rugomo rukubiyemo inkubiri yibasira ubuzima bw’umuntu.
Umuhanzi ukunzwe n’abatari bake muri Afurika uzwi ku izina rya Burna Boy, yanditse ku rukuta rwa Twitter avuga ko atazasubira muri Afurika y’Epfo mu gihe cyose abaturage b’iki gihugu batararekera guhohotera abanyamahanga.
Yagize ati “Sindasubira muri Afurika y’Epfo kuva mu 2017 kandi sinzasubirayo mu gihe cyose Guverinoma ya Afurika y’Epfo itakemura ikibazo. Siniyumvisha n’uburyo bazakemuramo iki kibazo.”
— Burna Boy (@burnaboy) September 3, 2019
Tiwa Savage nawe yatangaje ko yamaze gusubika igitaramo yagombaga gukorera mu gihugu cy’Afurika y’Epfo ku mpamvu y’ihohoterwa rikomeje gukorerwa abanyamahanga bari muri iki gihugu.
Iki cyemezo cya Tiwa Savage, cyashigikiwe nibyamamare bitandukanye birimo Awilo Longomba wo muri Repubulika Iharanira Demokarasi ya Congo (RDC), Zari Hassan wahoze ari umugore wa Diamond Platnumz n’abandi.
Tiwa Savage wo muri Nigeria yavuze ko yagombaga kuririmba mu iserukiramuco rizaba kuwa 21 Nzeri 2019 mu Mujyi wa Johannesburg.
Yavuze ko atakomeza kureberera ubwicanyi bubera muri Afurika y’Epfo. Ati “Ibi birarambiranye. Ku bw’izo mpamvu ntabwo nzaririmba mu iserukiramuco rizabera mu Mujyi wa Johannesburg. Amasengesho yanjye agere ku bahohotewe ndetse n’imiryango yagizweho ingaruka n’ibi.”
I refuse to watch the barbaric butchering of my people in SA. This is SICK. For this reason I will NOT be performing at the upcoming DSTV delicious Festival in Johannesburg on the 21st of September. My prayers are with all the victims and families affected by this.
— Tiwa Savage ⚔️ (@TiwaSavage) September 4, 2019
Polisi yo muri Afurika y’Epfo yakoze uko ashoboye mu gutatanya urubyiruko n’abandi bishoboye mu bikorwa byo guhohotera abanyamahanga muri Afurika y’Epfo.
BBC dukesha iyi nkuru yatangaje ko abantu batanu bamaze kugwa muri iryo hohoterwa ryibasiye abanyamahanga.
