Gen Vincent Nyakarundi wa RDF ari mu Burundi
Brig Gen Vincent Nyakarundi ukuriye ubutasi mu gisirikare cy’u Rwanda (RDF) ari i Bujumbura mu gihugu cy’u Burundi aho yitabiriye inama yiga ku mutekano w’akarere ka Afurika y’iburasirazuba (EAC).
Muri iyi nama yatangiye kuri uyu wa 6 Ukuboza 2021, Gen. Nyakarundi yahuriyemo na bagenzi be bayoboye inzego zishinzwe iperereza mu ngabo z’u Burundi, Kenya, Uganda, Sudani y’Epfo na Tanzania.
Igisirikare cy’u Burundi kuri Twitter cyatangaje ko baganiriye ku buryo ibihugu bigize uyu muryango byarushaho kwifanya mu kurwanya ibikorwa by’iterabwoba, ibyaha byambukiranya imipaka n’imitwe yitwaje intwaro. Guhanahana amakuru avuye mu butasi no gukomeza ubufatanye nabyo byigiwemo.
Gen Nyakarundi yaherukaga i Bujumbura muri Nyakanga 2021 mu nama yahurije hamwe abayobora inzego z’iperereza ry’ibisirikare mu Burundi, u Rwanda, Tanzania, Uganda na Repubulika ya Demokarasi ya Congo.
Ibiganiro bagiranye byari bisa n’ibi bya EAC.
