FIFA: Amavubi yasubiye inyuma, Abafaransa n’Ababiligi bisanga bombi ku mwanya wa mbere
Urutonde ngarukawezi rwa FIFA rugaragaza uko ibihugu byitwaye mu mupira w’amaguru rwasize ikipe y’igihugu Amavubi yisanze ku mwanya wa 137, mu gihe Les Bleus y’Abafaransa na Les Diables Rouges y’Ababiligi ari bo bayoboye isi muri ruhago.
Ni urutonde rwasohotse kuri uyu wa kane, ku wa 20 Nzeri 2018.
Uru rutonde rwasize Amavubi asubiyeho inyuma umwanya umwe, kuko urwo mu kwezi gushize rwasize u Rwanda ruhagaze ku mwanya wa 136 ku isi.
Ku rwego rw’Isi, ikipe y’igihugu y’Ububiligi yafashe umwanya wa mbere, ihasanze Ubufaransa bwegukanye igikombe cy’Isi mu mezi abiri ashize. Ni ku nshuro ya mbere uyu mwanya wa mbere usangiwe n’amakipe abiri kuva uru rutonde rushyizweho mu myaka 25 ishize.
Ibi bihugu bikurikiwe na Brazil, Croatia, Uruguay, Ubwongereza, Portugal, Ubusuwisi, Espagne na Denmark mu myanya 10 ya mbere ku Isi.
Ku mugabane wa Afurika, Tunisia ni yo yafashe umwanya wa mbere, ikurikiwe na Senegal, ku mwanya wa gatatu haza Repubulika iharanira Demokarasi ya Congo, Maroc iza ku mwanya wa kane, iya gatanu ni Nigeria, ku mwanya wa gatandatu haza Cameroon, Ghana ni iya karindwi, iya munani ni Burkinafaso, Mali ni iya cyenda mu gihe Misiri yafashe umwanya wa 10.
