FERWAFA yatangaje igihe umukino wa Super Cup uzabera
FERWAFA yemeje ko umukino wa nyuma w’igikombe cya Super Cup uzabera kuri stade Umuganda, mu karere ka Rubavu tariki ya 06 Ukwakira 2018.
Uyu mukino uzaba ku isaha ya saa cyenda (15:00), uzahuza APR FC yatwaye igikombe cya shampiyona na Mukura VS yatwaye igikombe cy’Amahoro itsinze Rayon Sports ku mukino wa nyuma.
Iyi kipe y’ingabo z’igihugu yatwaye igikombe cya shampiyona ya 2017/2018 ifite amanota 66, irusha amanota atanu AS Kigali yarangije ku mwanya wa 2, yatsinze imikino 19 inganya 9 itsindwa 2, ndetse yatsinze ibitego 51 mu mikino 30 yakinwe muri shampiyona. Kugeza ubu ntabwo yari yashikirizwa igikombe yatwaye.
Mukura VS bagiye guhura, yatwaye igikombe cy’amahoro itsinze Rayon Sports kuri penaliti 3-1, iki ni cyo gikombe cya mbere yari itwaye mu marushanwa yo gukuranamo guhera mu 1992. Yanagitwaye kandi mu 1978, 1986 na 1990.
Iyi ni yo nshuro ya mbere aya makipe yombi agiye guhurira mu mukino w’igikombe cya Super Cup kuva cyashyirwaho mu myaka 2 ishize .
Umwaka utaha wa 2019, APR FC izakina imikino ya Total CAF Champions League kubera ko yatwaye igikombe cya shampiyona mu gihe Mukura VS izahagararira u Rwanda mu mikino ya Total CAF Confederation Cup, muri iyi mikino uyu mwaka u Rwanda ruhagarariwe na Rayon Sports iri muri 1/4 nyuma yo kutitwara neza muri CAF Champions League ndetse ubu iri muri Nigeriya aho yagiye gukina na Enyimba FC mu mukino wo kwishyura , ubanza banganyije 0-0. Rayon Sports irasabwa gutsinda cyangwa ikanganya ku mubare w’ibitego runaka igahita ikatisha itike ya 1/2.
Uyu mukino wa Super Cup usubijwe i Rubavu nyuma y’uko uheruka wahabereye wari wahuje APR FC na Rayon Sports wasize impaka kubera ko umuriro wabuze bigatuma usubikwa ugasubukurirwa i Kigali. Rayon Sports ni yo yatwaye iki gikombe.
