UEFA Champions league: Totenham inganyije na Juventus, City inyagira Fc Basel.
Imikino ibanza ya kimwe cy’umunani mu irushanwa rihuza amakipe yabaye aya mbere iwayo I Burayi irangiye amakipe abiri yo mu Bwongereza abashije kwihagararaho hanze, binayaha amahirwe yo kugera muri kimwe cya kane cy’irangiza.
Ikipe ya Tottenham Hotspur yari yerekeje I Turin ku kibuga k’ikipe ya Juventus de Turin. Ni umukino ikipe ya Juventus yatangiye yataka cyane ku buryo byanayihiriye kubona igitego hakiri kare, kuko ku munota wa 2 w’umukino Gonzalo Higuain yaje kubona igitego cya mbere kuri Coup franc yari itewe na Miralem Pjanic.
Juventus yakomeje kwataka bityo binayiha amahirwe yo gutsinda igitego cya kabiri cyatsinzwe nanone na Gonzalo Higuain kuri penaliti, nyuma y’ikosa Ben Davies yari akoreye Bernadeschi mu rubuga rw’amahina ahagana ku munota wa cyenda w’umukino.
Nyuma yo gutsindwa igitego cya kabiri, abasore b’umutoza Maurchio Potchetino bakangutse binatuma basubiza inyuma ikipe ya Juventus.
Ukwataka kwa Tottenham kwaje kuyibyarira igitego ku munota wa 35 ku mupira Dele Alli yahaye Harry Kane utajuyaje gucenga umuzamu Buffon maze umupira awushyira mu rushundura.
Mu gice cya kabiri ikipe ya Juventus yabonye amahirwe yo gutsinda igitego cya gatatu binyuze ku ikosa Serge Aurier yari akoreye Douglas Costa mu rubuga rw’amahina, Gusa Gonzalo Higuain washoboraga gutsinda ibitego 3 muri uyu mukino penaliti yayiteye umutambiko w’izamu.
Ikipe ya Spurs yakomeje kotsa Juventus igitutu binyuze kuri Mussa Dembele wari wazonze abo Hagati ba Juventus maze ku munota wa 71 w’umukino umunya Denmark Christian Eriksen atsinda igitego cya Kabiri kuri coup franc.
Ku rundi ruhande ikipe ya Manchester City yo yari yasuye Fc Basel yo mu Busuwisi. Ni umukino woroheye cyane abasore b’umutoza Pep Guardiola Kuko nk’igice cya mbere cy’umukino cyarangiye Manchester City yifitiye ibitego byayo bitatu.
Muri uyu Mukino ikipe ya Man City yatsinzemo ibitego 4-0 harimo 2 by’umudage Ikary Gundogan, 1 cya Sergio Kunu Aguero ndetse n’igitego cya Bernardo Silva.
Uyu munsi imikino ya Champions League Irakomeza aho Liverpool igomba gusura Porto yo muri Portugal mu gihe umukino isi yose ihanze amaso ari ugomba guhuza Real Madrid na Paris Saint Germain kuri Estadio Santiago Bernabeu.
