EPL: Liverpool yujuririje kuri Manchester United imikino 39 idatsindwa

Umukino wahuje ikipe ya Liverpool ihagaze neza muri shampiyona y’Abongeleza ya 2019-2020 na Manchester United wabaye ku mugoro ba wo ku Cyumweru tariki ya 19 Mutarama 2020, wasize Liverpool ikomeje kwicara ku mwanya w’imbere.

Hakinwaga umukino w’umunsi 23 wa shampiyona y’Abongereza, aho uyu mukino warangiye Liverpool yitwaye neza itsindira Manchester United imbere y’abakunzi bayo(Liverpool) ibitego 2-0 bituma yuzuza imikino 39 idatsinzwe na rimwe.

Amakipe yombi yagerageje gufungura umukino ndetse anashakisha ibitego gusa Liverpool yakiniraga imbere y’abafana bayo yihariye igice kinini cy’uyu mukino inarema uburyo bwinshi kurusha mukeba, gusa abasore ba Manchester United na bo bacishagamo bakarema uburyo biciye kuri Daniel James na Anthony Martial.

Ku munota wa 14 Liverpool yafunguye amazamu ibifashijwemo na Virgil Van Dijk. Hari ku mupira wari uturutse kuri koruneri ya Trent Alexander-Arnold, usanze uyu myugariro w’umuholandi awutereka mu rucundura n’umutwe.

Abasore b’umutoza Ole Gunnar Solskjaer bakoze ibishoboka ngo bishyure iki gitego mbere y’uko igice cya mbere cy’umukino kirangira, gusa ntibashobora kubigeraho.
Igice cya kabiri cy’umukino muri rusange cyaranzwe no gusatirana gukomeye ku mpande zombi, Manchester United ishaka igitego cyo kwishyura mu gihe Liverpool nayo yacungiraga hafi ngo ibone igitego cya kabiri.

Ikizere cyo guhagarika Liverpool abafana ba Manchester United bari bafite, cyarangiye burundu ku munota wa 90 w’umukino ubwo Mohamed Salah yatsindiraga Liverpool igitego cya kabiri.

Ni ku mupira muremure yari aterewe n’umuzamu Alisson Becker, mbere yo kuwufunga agaca mu rihumye ba myugariro ba Manchester United bisanze yamaze kubatsinda igitego.

Uyu mukino watumye Liverpool ikomeza kuyobora shampiyona y’Abongereza 64, mu gihe igifite umukino w’ikirarane ugomba kuyihuza na West Ham United.

Iyi kipe y’umutoza Jurgen Klopp irarusha Manchester City iyikurikiye amanita 16.