EAC Military Games: Sugira uri mu bihe byiza yafashije APR FC gutsinda TPDF
Ikipe ya APR FC ihagarariye u Rwanda mu mikino ya gisirikare ihuje ibihugu byo mu karere ka Afurika y’Iburasirazuba, yongeye kwitwara neza itsinda TPDF ihagarariye igihugu cya Tanzania ibitego bitatu kuri kimwe.
Sugira Ernest na Ishimwe Kevin bari bafashije gutsinda Muzinga, bongeye kwitwara neza uyu munsi bayifasha gutsindira TPDF kuri stade ya Kasarani muri Kenya.
Sugira Ernest yatsindiye APR FC igitego cya mbere ku munota wa 10 w’umukino, Ishimwe Kevin atsinda icya kabiri ku munota wa 43 mbere y’uko Sugira asoza akazi ku munota wa 64 atsinda igitego cya gatatu.
Amakipe yombi yakinnye uyu mukino yishakamo igomba gukomezanya umwanya wa mbere, dore ko yari yarashoboye gutsinda imikino ibiri yaherukaga gukina.
Gutsinda TPDF byafashije APR FC gukomeza kuyobora amakipe ari muri iyi mikino, mbere yo guhura na Ulinzi Stars ihagarariye igihugu cya Kenya. Mu gihe APR FC yaba ishoboye gutsinda cyangwa kunganya uyu mukino izakina ku wa gatanu w’iki cyumweru, yahita yegukana igikombe cy’iyi mikino ya gisirikare.
